Цаг агаарын нөхцөл байдлаас шалтгаалж хаврын улиралд хуурайшилт их, үүнийг дагаад ой, хээрийн түймэр гарах эрсдэл маш өндөр байдаг. Ой хээрийн түймрийн 60 гаруй хувь нь 4, 5 дугаар сард гардаг байна.

Ой хээрийн түймрийн талаар ОБЕГ-ын Гал түймрийн тэмцэх газрын гал унтраах хэлтсийн мэргэжилтэн, дэслэгч Б.Ариунбатаас зарим зүйлийг тодрууллаа.

-Хуурайшилт их байгаа учраас ой хээрийн түймэр нэлээд гараад гарч байгаа. Он гарснаас хойш хэчнээн түймэр гарсан бэ?

Он гарснаас хойш есөн аймгийн 23 суманд 31 ой хээрийн түймэр бүртгэгдсэн.  Тодруулбал, Хөвсгөл, Сэлэнгэ,  Төв, Булган, Архангай, Зүүн бүсийн Хэнтий, Сүхбаатар Дорнод, Дундговь аймагт бүртгэгдсэн байна. Одоогийн байдлаар Хөвсгөл аймгийн Эрдэнэбулган суманд ой хээрийн түймэр бүртгэгдсэн. Уг түймрийг унтраахаар онцгой байдлын  байгууллага болон орон нутгийн мэргэжлийн анги, иргэд унтрахаар ажиллаж байгаа. Ерөнхийдөө гуравдугаар сарын 20-ноос зургаан сарын 10-ны хүртэл хугацааг  түймрийн аюултай үе гэдэг. Өнжмөл өвс  буюу шар өвс  шатаж, ой  хээрийн түймэр гардаг. Ихэвчлэн хавар, намар хуурайшилт их байдаг учраас  ой хээрийн түймэр гардаг.

-Ой хээрийн түймэр юунаас болж их гарч байна бэ. Хүний буруутай үйл ажиллагаатай холбоотой байна уу?

-Ой хээрийн түймэр олон хүчин зүйлээс шалтгаалдаг. Гэхдээ 90 орчим хувь нь хүний буруутай үйл ажиллагаатай холбоотой байдаг. Тодруулбал, галын аюулгүй байдлаа хангаагүй, ил задгай гал гаргах, хог шатаах, үнс нурмаа ил задгай асгах, түймрийн эрсдэлтэй бүсэд зорчихдоо галын аюулгүй байдлаа хангаагүй байдлаас болдог. Ер нь бол санаатай болон санамсар болгоомжгүй байдлаас болж гал их гардаг.

-Хүний буруутай үйл ажиллагаанаас болж гал гарсан тохиолдолд тухайн хүнд ямар хариуцлага тооцдог вэ?

-Цагдаагийн байгууллага шалгаж, арга хэмжээ авдаг. Хэрэг бүртгэлийн ажиллагаа  явуулж, шалтгаан нөхцөлийг тогтоодог.

-Ой хээрийн түймэр  маш их га талбайг хамардаг. Ой хээрийн түймэрт ажиллаж байгаа алба хаагчдын хангамж нь хэр бэ?

-Ой хээрийн түймэр салхитай маш их хамааралтай. Хавар намрын улиралд манай орон салхи ихтэй байдаг учраас ой хээрийн түймрийн тархац нь маш хурдан байдаг. Ялангуяа зүүн бүсийн нутагт салхи ихтэй байдаг учраас ой хээрийн түймэр маш их га талбайг хамардаг. Гал түймрийг унтраахаар ажиллаж байгаа алба хаагчдын хангамж сайжирсан байгаа.

-Иргэд ой хээрийн түймэр гарахаас урьдчилан сэргийлэх тулд иргэд юу дээр анхаарах ёстой вэ?

-Цахим сүлжээ хөгжсөн учраас хүн бүр мэдээлэл сайн авдаг болсон. Түймрийн эрсдэл өндөртэй газар амьдарч байгаа иргэд хамгийн их анхаарал болгоомжтой байх хэрэгтэй. Хамгийн энгийн зүйлийг иргэд хэвшил болгох чухал. Тухайлбал, үнс нурмаа бүрэн унтраасны дараа тагтай саванд хийх, ил гал гарахгүй байх, татсан тамхиыхаа ишийг унтрааж хаях хэрэгтэй байна. Мөн хог хаягдлаа ил задгай шатаадаг. Эдгээр зүйлүүдээр дээр хүн бүр анхааралтай  байх нь чухал юм. Одоо урин дулаан цаг ирж байгаа учраас иргэдийн аялал зугаалгын үе эхэлдэг. Энэ үед иргэд ил гал түлчхээд түүнийгээ унтраахгүй орхидог. Үүнээс болж  гал гарах тохиолдол их байдаг. Онцгой байдлын газраас ой хээрийн түймрээс урьдчилан сэргийлэх  чиглэлийн мэдээллийг тогтмол хүргэж байгаа.