Баасан гаригт манай орны хойд зүгийн нутгаар нар чихлэх үзэгдэл ажиглагджээ. Гэрлийн хугарлын нөлөөгөөр нар гурав болсон мэт харагддаг эл үзэгдлийг шинжлэх ухаанд "parhelion" буюу "хуурамч нар", харин монголчууд "нар чихлэх", "нар гуравлах" хэмээн нэрлэдэг аж.  Нар чихлэх нь жирийн ямар ч улиралд, дэлхийн аль ч өнцөг, буланд ажиглагддаг ч "Манай оронд сүүлийн хэдэн арван жил тохиогоогүй" хэмээн Ус, цаг уурын хүрээлэнгийн мэргэжилтнүүд мэдэгдлээ.

Агаар мандалд усны уур өтгөрснөөр нарны гэрэл хугарч, гэрлийн хүрээ үүсдэг бөгөөд зарим тохиолдолд хоёр хүрээ үүсч, тэр нь хоорондоо огтолцсоноор гурван нар гарсан мэт харагддаг байна. Хэдийгээр хуурамч нар үүсэх нь Европ, Хойд Америкийн орнуудад долоо хоногт 1-2 удаа тохиолддог боловя ихэвчлэн нар мандах эсвэл жаргах үед ажиглагддаг учир үзэгдэх хугацаа нь богино байдаг гэнэ. Тэгвэл баасан гаригт гарсан "хуурамч" нар Дархан-Уул, Сэлэнгэ, Дорноговь аймагт зургаан цагийн турш тод харагдсан байна.

Сонирхуулахад агаар мандлын эл үзэгдэл Ангараг, Бархасбадь, Санчир, Далайн ван, Дэлхийн зэрэг нарны аймгийн бусад гариг төдийгүй саран дээр ч ажиглагддаг байна.