Одож буй, үрэгдэж буй бүхэнд учир бий хэмээсэн яруу найрагч агсан Ж.Болд-Эрдэнийн үгний учгаас атгасан Д.Ган-Очир ертөнцийн мөнх бусыг үзсэн анд ах, багш нарынхаа тухай өөрийн бодролыг бусадтайгаа хуваалцахыг хүсэмжилжээ. Тэрээр олон арван жилийн туршид бодол, сэрлээ давхар ургуулан утга зохиолыг амьдралынхаа нэгээхэн хэсэг болтол үзэг, цаасыг олондоо цоохорлож явсан үйл хэргийнхээ зах зухаас ийнхүү уншигч олондоо уудалж буй нь энэ аж.

 

Зохиогч номондоо Дорнод аймгийн утга зохиолын нэгдлийн гишүүн, яруу найрагч Б.Бат-Орших, Хувилгаан Со лам буюу Т.Содномнамжил, Эрээнцавын их хүмүүн яруу найрагч Д.Нямсүрэн, Н.Дугарсүрэн, нэрт сэтгүүлч-орчуулагч Ж.Нэргүй гэхчилэн олон яруу найрагч, зохиолчдын тухай түүх дурсамжийг хүүрнэхийн зэрэгцээ өөрийн дотоод сэтгэлийг илэрхийлсэн элдэв бодрол, эссэ, утга зохиолын мөн чанарыг танихаар төвдөж буй нэгэнд илгээсэн захидал зэргийг эмхэтгэн оруулжээ.