Их эзэн Чингис хаан мэндэлсний 856 жилийн ой “Монгол бахархлын өдөр” энэ сарын 08-ны өдөр тохиож байна. Монгол Улсын Ерөнхийлөгчийн 2012 оны 1 сарын 9-ний өдрийн 4 тоот зарлигаар эзэн богд Чингис хааны мэндэлсэн огноог холбогдох ажлын хэсгийн дүгнэлт болон ШУА-ны саналд үндэслэн албан ёсны болгож, билгийн тооллын өвлийн тэргүүн сарын шинийн нэгэн гэж тогтоон, уг өдрийг "Монгол бахархлын өдөр" болгон тэмдэглэн өнгөрүүлж байхаар болсон. Энэ өдрийг бүх нийтийн амралтын өдөр болгон тэмдэглэн өнгөрүүлдэг.

Энэ жил уламжлал ёсоор "Монгол бахархлын өдөр"-т зориулсан чансаа өндөр хүчит 128 бөхийн барилдаан “Буянт-Ухаа” спортын ордонд 2018 оны 11 дүгээр сарын 08-ны  өдрийн 14:00 цагт эхэлнэ. Үзэгч та бүхэн тус барилдааныг МҮОНТ, Mongolian National Broadcaster фэйсбүүк хуудас, MNB.mn сайтаар шууд хүлээн авч үзээрэй.

Сонирхуулахад, 2017 оны "Монгол бахархал"-ын өдрөөр барилдсан хүчит 128 бөхийн барилдаанд Говь-Алтай аймгийн Чандмань сумын харьяат, Хантайшир бөхийн дэвжээ, Туушин компанийн бөх, Монгол Улсын гарьд Н.Ганбаатар түрүүлж, Дундговь аймгийн Эрдэнэдалай сумын харьяат, “Алдар” биеийн тамир, спортын хорооны бөх, Монгол Улсын идэр начин Э.Даш үзүүрлэж байв.