Энэ онд НДЕГ-аас улсын хэмжээнд “Эрүүл мэндийн даатгалын тусламж, үйлчилгээ үзүүлэх, худалдан авах гэрээ”-гээ шинэчлэн Эрүүл мэндийн байгууллагуудтай байгуулахаар боллоо. Уг гэрээ нь даатгуулагчид чанартай, хүртээмжтэй, эрүүл мэндийн даатгалын тусламж үйлчилгээг хүргэхэд шаардлагатай бүхий л үйл ажиллагааг нийгмийн даатгалын байгууллага эрүүл мэндийн байгууллагуудтай хамтран хэрэгжүүлэх боломжийг бүрдүүлэх юм.

 

Энэхүү гэрээнд:

-  Даатгуулагчид үзүүлж буй эрүүл мэндийн тусламж, үйлчилгээний чанартай холбоотой эмнэлзүйн стандарт, удирдамж, зааврыг чанд мөрдөх

-  Эмчилгээ, оношлогоонд алдаа гарсан байж болзошгүй тохиолдлын үед тухайн чиглэлээр өндөр түвшинд мэргэшсэн, туршлагатай ижил мэргэжилтний хөндлөнгийн шинжээчийн багаар үзлэг хийж, дүгнэлт гаргуулах

- Даатгуулагчийн дуу хоолойг сонсох зорилгоор нийгмийн даатгалын байгууллагаас даатгуулагчийн сэтгэл ханамжийн судалгаа болон шууд утас ажиллуулах

-  Эрүүл мэндийн байгууллага нийгмийн даатгалын байгууллагын хамтын ажиллагааг сайжруулахтай холбоотой компьютерт суурилсан түүврийн аргаар нэхэмжлэл, жагсаалтыг хянах хяналтын тогтолцоог нэвтрүүлэх

- Даатгуулагчид эмнэлзүйн цогц үйлчилгээ үзүүлэх нөхцлийг бүрдүүлэх, алдаа дутагдлын учир шалтгаан, хамаарлыг тогтоох, хамтран шийдвэрлэх, цаашид дахин давтан гаргахгүй байх нөхцөл боломж, арга замыг тодорхойлох

зэрэг шинэ арга хэмжээнүүдийг тусган Хүн амын хөгжил нийгмийн хамгааллын  яам, Эрүүл мэндийн яамнаас гэрээний төсөлд санал авч Нийгмийн даатгалын үндэсний зөвлөлөөр батлуулахаар бэлтгээд байна.

 2014 онд шинэчилсэн энэхүү гэрээгээрээ эрүүл мэндийн байгууллагуудтай байгуулах бөгөөд  даатгуулагчийн авах эрүүл мэндийн даатгалын тусламж, үйлчилгээний чанарыг сайжруулахад чиглэсэн дорвитой шинэчлэлийн арга хэмжээ болж буйгаараа онцлог ач холбогдолтой юм.