Увс аймгийн прокурорын газар, Цагдаагийн газартай хамтран энэ  сарын 19-ний өдрөөс 25-ны өдрийн хооронд тус аймгийн Наранбулаг, Завхан, Өлгий, Өмнөговь, Ховд, Бөхмөрөн сум, багуудад гэмт хэргээс урьдчилан сэргийлэх ажлын хүрээнд ажилласан байна. Уулзалтад аймгийн прокурор Т.Мөнхбаяр 2013 онд аймгийн прокурорын газраас хийсэн хяналтын ажлыг товч танилцуулан, аймгийн хэмжээнд гарсан гэмт хэргийн талаар болон архидан согтуурахтай тэмцэх тухай хууль, тамхины тухай хууль, гэр бүлийн хүчирхийлэлтэй тэмцэх тухай хуулиудын талаар тус тус мэдээлэл өгч харилцан ярилцаж санал хүсэлтийг нь сонсчээ. 

Дээрх ажлын хүрээнд Бөхмөрөн сумын хоёрдугаар багийн нутаг дэвсгэрт байрлах “Хотгор”-ын нүүрсний уурхай дээр зөвшөөрөлгүй архи, тамхи зарж борлуулж байсан дөрвөн дэлгүүрийн үйл ажиллагааг түр зогсоожээ. Мөн худалдаалж байсан 12 нэр төрлийн 437 шил архи, хоёр нэр төрлийн 333 ширхэг пиво, хоёр нэр төрлийн 16 шил дарс болон найман нэр төрлийн 136 хайрцаг тамхи зэрэг эд зүйлийн хураан авч сумын холбогдох байгууллагад нь шийдвэрлүүлэхээр шилжүүлсэн байна.