MNB.mn сайт “Редакцын зочин” буландаа “Ээгий косметикс”-ийн үүсгэн байгуулагч, Нүүр будалтын дэлхийн аварга Б.Энхчимэгийг урьж, маш сонирхолтой ярилцлага өрнүүллээ.

-Юун түрүүнд бидний урилгыг хүлээн авсан танд баярлалаа. Нүүр будалтын ДАШТ-ий анхны монгол аварга болсонд баяр хүргэе. Нүүр будалтын дэлхий аварга шалгаруулах тэмцээний үүх түүх, энэ жилийн зохион байгуулалтын талаар дэлгэрэнгүй мэдээлэл өгөөч. Таны бусад оролцогчдоос давуу тал юу байв?

-Урьж оролцуулж байгаад маш их баярлалаа. Намайг Энхчимэг гэдэг. Жил бүр зохион байгуулагддаг Дэлхийн гоо сайханчдын олимп гэгддэг “OMC Hair world” буюу Нүүр будалтын дэлхийн аварга шалгаруулах тэмцээн 75 дахь жилдээ буюу энэ онд Франц улсад болох байсан боловч энэ жил “КОВИД-19” цар тахлын нөхцөл байдлаас шалтгаалан анх удаа цахим хэлбэрээр зохион байгуулагдсан. Манай улсаас Монголын үсчин гоо засалчдын мэргэжлийн холбоогоор дамжуулан үсчин, гоо сайханчид өргөн бүрэлдэхүүнтэйгээр 15 дах жилдээ энэхүү тэмцээнд амжилттай оролцож, олон шагналыг эзэн болсон. Энэ ташрамд, МҮГЗХ-ны ерөнхийлөгч Довчинсүрэн даргадаа монгол залуусаа дэлхийд өрсөлдөх гүүр нь болж ирсэнд маш их баярлалаа гэж хэлмээр байна.

Монгол Улсаас нийтдээ 35 хүний бүрэлдэхүүнтэйгээр үс, хумс, нүүр будалт төрөлд хоёр сар гаруй хугацаанд бэлдсэн. Энэ жилийн ДАШТ-д 2000 гаруй гоо сайханч 10 мянга орчим “бүтээл”-ээр өрсөлдсөнөөс Монголын оролцогчид хуримын нүүр будалтын төрлөөр Дэлхийн аваргын цом, эрэгтэй үсний креатив төрлөөр нэг мөнгө, нэг хүрэл, эмэгтэй үс тайралтын төрлөөр нэг хүрэл, хумсны фантаз төрлөөр нэг хүрэл медаль, тусгай тавдугаар байрт шалгарсан амжилттай оролцлоо.

Өмнө нь ч гэсэн мэргэжил нэгт найзууд, ах эгч нар яваад олон мундаг амжилт үзүүлж ирснийг энэ онд ч гэсэн бид залгамжилсан. Өдийг хүртэл дасгалжуулсан бүх дасгалжуулагч трэйнерүүддээ баярлалаа гэж хэлмээр байна.

Энэ жилийн тухайд Монгол Улсын оролцогчид анх удаа нүүр будалтын төрөлд аваргын цом, эмэгтэй үсний тайралтын төрөлд анхны хүрэл медалийг авсан. Мөн хумс засалтын төрөлд анх удаа оролцоод хүрэл медаль авсан болохоор бусад улсын хүмүүс Монголын талаар маш их сонирхож байгаа байх. Цаашид олон олон мундаг залуучууд бидэнтэй нэгдэж өөрсдийн ур чадвараа таниулна гэдэгт итгэж байна.

-Та өнгөрсөн онд Франц улсад зохион байгуулагдсан нүүр будалтын ДАШТ-д оролцсон хүний хувьд энэ жил онлайнаар өрсөлдөхөд ямар онцлогууд тулгарав?

-Онлайнаар маш олон хүн орно гэж тооцоолж байсан ч бүр төсөөлснөөс ч  их оролцогч оролцсон. Бүх оролцогч өөрийн ур чадвараа тултал нь дайчилж өрсөлдсөн тэмцээн болсон. Зардал мөнгөний тухайд ч тэр очиж оролцохоос хамаагүй бага зардалтай байлаа. Энэ нь нэг талаараа маш том давуу тал болсон. Ер нь гоо сайхны төрлийн тэмцээнд оролцоход төрөөс дэмжлэг үзүүлдэггүй учраас бид зардлаа өөрсдөө даадаг.

Гадны улс руу явж тэмцээнд оролцоход хувцас, модель, будаг хэрэгсэл, тийз, буудлын төлбөр гэх мэтээр хувь хүнээс асар өндөр зардал гардаг. Өнгөрсөн жил Францын Парист болсон тэмцээний зардал гэхэд 30 сая орчим төгрөг болсон.  Бүтэн жилийн турш ажиллаад олсон орлогоосоо зардлаа даагаад улсаа төлөөлж тэмцээнд явдаг гэсэн үг.  Улсаас дэмжих бодлого одоогоор байхгүй байгаа ч удахгүй гоо сайхны салбарыг үнэлдэг, дэмждэг болно гэдэгт итгэж байна. Холбоо маань ч энэ тал дээр маш их ажлыг хийж байгаа.

Миний хувьд энэ оны ДАШТ өмнөх жилийн өөрийн хувийн амжилтаа дээшлүүлж чадсан тэмцээн боллоо. Гурван төрөлд оролцсоноос хуримын нүүр будалт (Bridal make up)-ын Дэлхийн аварга, тайзны нүүр будалт(Stage make up) төрөлд  10 дугаар байр, гоёлын смоки будалт (Smokey make up)-ын  төрөлд 11 дүгээр байр гэсэн амжилт үзүүлсэн. Маш олон улсын олон оролцогч оролцсон ДАШТ учир чамлахааргүй том амжилт гаргаж чадсан.

-Та багадаа ямар авьяастай хүүхэд байв. Бидний багад нүүр будалт, гоо сайхны мэргэжлүүдийн талаарх мэдээлэл бараг л байхгүй байсан. Та яагаад одоогийн мэргэжлээ сонгосон бэ?

-Аав, ээж хоёр маань багш хүмүүс болохоор багадаа их л нийгмийн идэвхтэй, дуулдаг, бүжиглэдэг, сургуулийнхаа ихэнх үйл соёлын үйл ажиллагаанд оролцдог хүүхэд байлаа. Би чинь тэс өөр солонгос хэлний орчуулагч мэргэжилтэй хүн шүү дээ (инээв). Мэргэжил минь надад маш олон боломжийг нээж өгсөн. Нүүр будалтаараа БНСУ-д мэргэжил дээшлүүлэх, “Eegii cosmetics” брэнд бүтээгдэхүүнээ үйлдвэрлэх гээд л энэ болгонд үндсэн мэргэжил минь хэргээ гаргасан. Нүүр будалт бол ерөөсөө л дуртай зүйл хобби маань байлаа. Хүн чинь дуртай зүйлдээ хийгээд ирэхээр ядарч ялагдаж,  залхуурахыг огтоосоо мэддэггүй юм билээ.

Нүүр будалттай холбоотой ямар нэгэн ажлыг хийхээр л өөрийн эрхгүй жаргалтай, хэчнээн ядарсан ч байсан хамаагүй эхэлснээ дуусгадаг, түүнээсээ кайф, эрч хүч, сайхан мэдрэмжийг авдаг байсан.

Ер нь л бага байхын ээжийнхээ нүүрээ будахыг нь хараад зогсож байдаг охин байлаа. Долоон жилийн өмнөөс яг нүүр будалтын урлагт эргэлт буцалтгүйгээр орж, эхлээд Монголдоо суралцаж, сонирхол нэгт найзуудаараа "Diva beauty academy"-г үүсгэн байгуулсан. Нүүр будалтын сургалт, үйлчилгээ явуулаад хэдийнээ долоон жилийг ардаа үджээ.

Энэ хугацаанд мэргэжил дээшлүүлэх зорилгоор БНСУ, Тайвань улсыг зорьж байсан нь нэг талаараа олон улсад гарах бидний хүслийг улам бадрааж өгсөн.

-Та Нүүр будалтын ДАШТ-ий хуримын нүүр будалтын төрөлд дэлхийн аварга болсон. Та хэчнээн сүйт бүсгүйн хурим дээр ажиллав. Сүйт бүсгүйчүүдийн танд хэлсэн мартагддаггүй талархлын үгс бий юу.

-Яг хуримын нүүр будалтаараа дагнавал энэ жилийг хүртэл 200 гаран сүйт бүсгүйтэй ажиллажээ. Сургалт, баяр ёслол, уран бүтээлээ тооцвол ч хэдэн мянга болох байх.

“Ёстой ийм болно гэж төсөөлсөнгүй”, “Ийм олон гоо сайхны бүтээгдэхүүн хэрэглэж будалт хийдэг юм уу”, “Өнөөдөр би үнэхээр хөөрхөн харагдаж байна” гэсэн үг л их сонсдог юм байна.

-Монголчууд хамтын амьдралаа эрт эхлүүлдэг ч санхүүгийн шалтгаанаас үүдэн хуримаа хожуу хийдэг. Тэгвэл бүсгүйчүүд хуримаараа ер нь элдэв баярын болоод хүндэтгэлийн арга хэмжээнд оролцохдоо мэргэжлийн нүүр будалтын артистад хандахын давуу тал юу вэ?

-Эмэгтэй хүн бүр өөрийн гэсэн давтагдашгүй гоо үзэсгэлэнтэй. Өөр өөрийн онцлог төрхтэй. Нүүр будалтаар та яаж л бол яаж л хувирч болно. Нэг ёсны шидэт дохиур л гэлтэй. Нүүр будалт маань дотроо маш олон төрөлтэй. Бүгд өөр өөрийн гэсэн утга агуулга онцлог шинжүүдтэй. Тухайн орчин, нөхцөл байдалд нь тохируулж будах нь хамгаас чухал. Бидний дийлэнхдээ хийдэг амьдралын нүүр будалтын зорилго нь хүнийг тэс өөр, шал танихгүй болгох биш. Миний ажил үйлчлүүлэгчийн  өөрийн гэсэн давтагдашгүй байгалийн гоо үзэсгэлэнг бага зэрэг тодотгож, гэрэлтүүлж, өөртөө итгэлтэй байхад нь туслах гэж боддог.

Эмэгтэй хүний хамгийн үзэсгэлэнтэй харагддаг өдөр бол хуримын өдөр.  Энэ ч утгаараа будалтууд дотроосоо хуримын будалт хамгийн чухал нь байдаг. Үзэсгэлэнтэй, ялдам, зөөлөн харагдуулах будалтууд илүү тохиромжтой. Өнгө сонголтоо хүртэл зөв хийх хэрэгтэй. Тиймээс өөрийн царай төрхөд чинь тохируулан будалт хийж өгөх нүүр будагчид тэр өдрөө даатгах нь чухал.

-Мэргэжлийн түвшинд нүүр будалт хийж сурахын тулд хэр их хугацаа зарцуулсан бэ?

-2013 оноос хойш долоо дахь жилдээ ажиллаж байна. Гоо сайхны салбар цаг минутаар шинэчлэгдэж хөгжиж, шинэ шинэ трэндүүд гарч байдаг салбарын нэг. Тэгэхээр үүнийг дагаад мэргэжилтнүүд маань ч гэсэн байнгын өөрсдийгөө хөгжүүлж, суралцаж явдаг. Сурахаа зогсоосон цагт хөгжил хамт зогсдог гэдэг дээ. Тиймээс манай салбарынхан байнга л суралцаж байж, илүү амжилтад хүрнэ гэж боддог.

-Би хувьдаа нүүр будалтыг нэг талдаа гоо сайхны арчилгаа, нөгөө талаас урлаг гэж ойлгодог. Тэгвэл энэ хоёр талыг эмэгтэйчүүд хэрхэн хослуулах ёстой вэ?

-Ерөөсөө нэг цогц зүйл. Хүн бүрийн царай төрх ондоо. Танд байгалиас заяасан давтагдашгүй гоо үзэсгэлэн бий. Тэрийг хэрхэн арчлах, авч явах нь таниас шалтгаална. Ер нь бол хүн болгон заавал будах албагүй.Заавал будаарай ч гэж хэлэхгүй. Хувь хүний сонголт, үзэл бодол юм уу даа.

Гэхдээ орчин үед байгаа орчин нөхцөлдөө тохируулаад өөрийгөө будаж чаддаг байх нь нэг талын чадвар, үнэлэмж болсон..

Эмэгтэйчүүл нүүрээ зүгээр л нэг будаад, олон янзын юм хольж түрхээд байгаа юм биш. Нүүр будалтаар арьсаа хамгаалдаг. Хэн нэгэнд таалагдах гэхээсээ илүүтэйгээр өөртөө таалагдаж, өөртөө итгэлтэй байдаг.Арьс арчилгаа зөв хийгдэж байж нүүр будалт төгс харагдах боломжтой. Тэгэхээр аль нэгийг нь салгаж, орхигдуулах боломжгүй.

-Эмэгтэй хүн хэдэн наснаас эхлээд хэд хүртлээ нүүр будалт хийвэл арьсанд нь элдэв сөрөг нөлөөгүй байдаг вэ. Монгол эмэгтэйчүүд нүүр будалт хийхдээ дийлэнхдээ ямар алдаа гаргадаг вэ?

-Одоо нүүр будах нас харьцангуй залуужаад байна. Манай охид нэг үеэ бодоход маш хөөрхөн мэдрэмжтэй, тухайн нөхцөл байдалдаа тохируулаад будчихдаг болсон. Мэдээж ямар нэгэн мэргэжлийн зөвлөгөөгүйгээр буруу бүтээгдэхүүн сонгож хэрэглэх нь хор нөлөөтэй. Гэхдээ сүүлийн үед өсвөр насны охидтой ээжүүд багаас нь зөв бүтээгдэхүүнээ хэрэглэж, арьсаа зөв арчлах тал дээр нь илүү анхаардаг болсон. Бүтээгдэхүүн сонголт тал дээр ч өсвөр насныханд зориулагдсан химийн найрлага багатай, органик бүтээгдэхүүнүүд үйлдвэрлэгдэх болсон. Өмнөхөөсөө илүү мэдээлэл, мэдлэгтэй болсон учраас хэт санаа зовохгүй байгаа.

-Монгол эмэгтэйчүүдийн арьс арчилгаа, нүүр будалтын тал дээр гаргадаг дийлэнх алдаа юу вэ?

-Манай бүсгүйчүүдийн гол анхаарах зүйл гэвэл арьсаа дутуу цэвэрлэдэг, буруу бүтээгдэхүүн сонгож хэрэглэдэг, нойр, хоол, хөдөлгөөнөө тэнцвэртэй байлгадаггүй. Мөн өөрөө судалж биш хүмүүсийн ам дамжсан яриагаар худалдан авалт хийдэг гэх мэт олон шалтгаан бий.

Үүнээс гадна манай орны цаг агаарын онцлог, эрс тэс уур амьсгал, агаарын болон орчны бохирдол зэрэг олон хүчин зүйлээс болж байнгын хамгаалалт, арчилгаа шаардагддаг. Тиймээс арьсаа гоё эрүүл болгоод араас нь өөрийн арьсны онцлогт тохирсон бүтээгдэхүүн ашиглан будалтаа хийж байгаарай. Мөн нүүр будалтаас илүү чухал зүйл бол арьс арчилгаа. Мэдээж элдэв, асуудалгүй арьсан дээр будалт хийх мэдрэмж ямар гоё байдаг билээ.

Нүүр будалтад мэдрэмж хамгийн чухал байдаг. Нэг хувийн мэдрэмж, авьяас байхад л бусад 99 хувийг нь өөрийн хичээл зүтгэлээрээ олж авна. Ер нь ямарваа зүйлийг хийхэд байнгын давтамж, хувь хүний зүтгэл л чухал байдаг. Чадахгүй ч гэсэн оролдоод л байвал алхам алхмаар сайжраад л байна.  Сүүлийн үед охид бүсгүйчүүд үнэхээр хөөрхөн, маш гоё буддаг болсон.

Мундаг артистууд, багш нар ч олон болж бид ч гэсэн бүсгүйчүүдийн гоо сайханд хувь нэмрээ оруулж байгаадаа туйлын баяртай байгаа. Мэдээж техникгүй буруу будсан хүмүүс зөндөө байгаа. Тэр хүмүүст туслах зорилготойгоор интернэт орчинд “Eegii cosmetics” фэйсбүүк хуудас, “Илүү үзэсгэлэнтэйгээр гэрэлт” фэйсбүүк группээрээ дамжуулан зөвлөгөө мэдээллийг байнга хүргэдэг.  Монгол охид бүсгүйчүүд нэг үеэ бодоход харьцангуй сайн мэдээлэлтэй болсон, өөрсдийн арьсанд хэрэглэх бүтээгдэхүүн, түүний найрлагад маш нухацтайгаар ханддаг болсон нь талархууштай. Гол нь өөрийн арьсны онцлогоо тодорхойлж мэдэж аваад түүнд тохирсон найрлагатай бүтээгдэхүүнийг хэрэглэх нь маш чухал.

-Монголын гоо сайхан, нүүр будалтын салбар дэлхийн өндөр хөгжилтэй орнуудынхтай харьцуулахад ямар түвшинд явж байгаа вэ?

-Монголд гоо сайхан нүүр будалтын салбар арваад  жилийн өмнөөс эрчимтэй хөгжиж одоо дэлхийтэй хөл нийлүүлэн алхаж байна гэж бардам хэлмээр байна. Бүр дэлхийд үнэлэгдэж эхэлсэн. Бид чадаж байгаа. Мундаг авьяастай бүсгүйчүүд, залуучууд олон олноороо гарч ирж байна. Биднийг бэлтгэсэн дээд үеийнхэн маань ч гэсэн их зүйлийг хийсэн. Цаашдаа Монголоос олон улс руу, дэлхий рүү чиглэсэн гоо сайхны, нүүр будалтын шинэ технологи, техникүүд гарна гэдэгт 100 хувь итгэлтэй байгаа шүү.

-Таны ажил мэргэжлээсээ авдаг хамгийн сайхан мэдрэмж юу вэ?

-Яг будалтаа хийж байх үед тухайн хүний бодлыг аягүй сайн мэдэрч ойлгодог болдог юм билээ. Үйлчлүүлэгч ямар будалт хүсээд байна, будалт нь таалагдаж байгаа эсэх, хэр аз жаргалтай байна, хэрхэн өөртөө итгэлтэй болж байна гээд л бүх сэтгэл хөдлөлийг нь хамт мэдэрдэг болсон. Гол нь надаар нүүрээ, хичээл заалгасан эмэгтэйчүүд маань өөртөө итгэлтэй болж ажил амьдралд нь эерэг өөрчлөлтүүд гарч байгаа нь мэргэжлийн маань хамгийн сайхан мэдрэмж а.  Кино уран бүтээлүүдийн хувьд дууссаных нь дараа өөрийнхөө хийсэн ажлыг үнэлээд, дүгнээд, төгсгөлд нь нэрээ хараад, үзээд суух хамгийн гоё мэдрэмж төрүүлдэг.

-Залуу хүн бүрт алс хэтийн зорилго гэж бий. Та өөрийн зорилго тэмүүллээсээ хуваалцаач?

-Дэлхийн аварга шалгаруулах тэмцээний 75 жилийн ой ирэх есдүгээр сард Япон улсад зохион байгуулагдана. Энэ ойд Монгол Улсынхаа шилдгүүдтэй оролцож аваргын цомоо бататгана гэсэн том зорилготой болсон.

Мөн “Eegii cosmetics” брэндийн бүтээгдэхүүнүүдээ илүү олон төрөл болгож, салбаруудаа нэмэх, олон улсад салбартай болох, шинэ салбартаа сургалт үйлчилгээнүүдээ явуулж эхлэх гэх мэт зорилгоо биелүүлэхийн тулд хичээнэ.

Цаашлаад Монгол Улсад Гоо сайханчдын олимп зохион байгуулагдах тэр өдөр хүртэл салбартаа хийж бүтээж болох бүхий л зүйлийг дэмжин ажиллахаар сэтгэл шулуудсан.

-Ярилцсанд баярлалаа. Ярилцлагыг тань уншиж суугаа охид бүсгүйчүүдэд, залуус юуг захиж хэлэх вэ?

-Танд мөн маш их баярлалаа, сайхан ярилцлаа.  Аливаа зүйлд чин сэтгэлээсээ хандаж, дуртай зүйлдээ үнэт цагаа зарцуулах, хичээж зүтгэж байгаа цагт шагнал нь нэг л өдөр хүрээд ирдэг юм байна.  Би нэг будалт хийгээд л дэлхийн аварга болчихож байгаа зүйл огтоосоо биш. Өнгөрсөн хугацаанд хөдөлмөрлөсөн зүтгэсний минь хариу ирлээ. Хүн бүрт өөрт оногдсон амьдралын цаг хугацаа гэж байгаа. Тэр хугацаагаа зөв, үр дүнтэйгээр ашиглаарай. Бүхий л зүйлд талархаж сураарай, Өөрийгөө хайрлахаа битгий мартаарай гэж залуустаа хэлмээр байна.