Өвөрхангай аймгийн Нийтийн хэв журам хамгаалах тасгийн дарга, Цагдаагийн хошууч Х.Батпүрэвээс дараах тодруулгыг авлаа. 

-Өндөржүүлсэн бэлэн байдал зарласан үед Өвөрхангай аймагт ямар ажил хийж, хэрэгжүүлж байна вэ?

-Дэлхий нийтэд тархаад буй коронавируст халдварын үед УОК, Монгол Улсын Шадар сайд, Аймгийн онцгой комиссын шийдвэр, ЦЕГ-ын дарга, Нийтийн хэв журмыг хамгаалах, олон нийтийн аюулгүй байдлыг хангах албаны дарга нараас өгч буй үүрэг чиглэлүүдийг Өвөрхангай аймгийн нутаг дэвсгэрт хэрэгжүүлэх, АОК-оос гарсан шийдвэрийг хэрэгжүүлэх чиглэлээр тус цагдаагийн газрын бие бүрэлдэхүүн өндөржүүлсэн бэлэн байдлын үед ажиллаж байна.

2020 оны 11 дүгээр сарын 11-ний өдөр Монгол Улс дотооддоо коронавируст халдвар алдсантай холбогдуулж бүх нийтийн бэлэн байдал зарласан үед Өвөрхангай аймаг дахь Цагдаагийн газрын бие бүрэлдэхүүн ажилласан. Үүнтэй холбогдуулж Өвөрхангай аймгийн нутаг дэвсгэрийг бүслэн хаах, тээврийн хэрэгслийн хөдөлгөөн болон хүний хөдөлгөөнийг хязгаарлах зорилгоор сумдад нийт 78 пост гаргаж, үйл ажиллагаа явуулсан.

Арвайхээр сумын хэмжээнд гэхэд л тойрсон 14 пост ажиллуулсан. Үүнтэй холбоотойгоор орох, гарах хөдөлгөөн буюу Засгийн газраас авч хэрэгжүүлсэн зөвшөөрөлтэй тээврийн хэрэгслийг баруун, зүүн хоёр цэгийн постоор нэвтрүүлж, бусад постуудын хөдөлгөөнийг хязгаарласан. "Ковид-19" вирус дотооддоо алдсан үетэй холбогдуулж иргэдийн хөдөлгөөн маш их ихэссэн. Малчид өвөлжилтийн бэлтгэл хангасан хэдий ч Өвөрхангай аймгийн нутагт өвөлжилт хүнд байгаатай холбогдуулж, идэш тэжээл татах, өвс тэжээл худалдан авах зэргээр хөдөлгөөн ихэссэн. Иймд хөдөлгөөн зохицуулах АОК-оос гаргасан шийдвэрүүд, ЦЕГ-ын удирдлагаас өгсөн үүрэг даалгавруудыг хэрэгжүүлж ажилласан.

Одоогийн байдлаар Өвөрхангай аймагт "Ковид-19" вируст халдвар бүртгэгдээгүй байна. Өнгөрсөн хугацаанд АОК-ын шийдвэрээр иргэдийг зохион байгуулалттайгаар татан авах ажлыг хоёр удаа гүйцэтгэлээ.

Өчигдөр иргэдийг татан авах ажил маань зогссон. Сэжигтэй бүс нутгаас ирсэн иргэдийг 155-р тушаалаар гэрийн ажиглалтад оруулах, гэрийн ажиглалтыг хянах, сумдын Засаг дарга, хорооны нийгмийн ажилтан, Улаан загалмайн нийгэмлэгийн гишүүдийг энэ ажилд татан оролцуулж байна.

Цагдаагийн байгууллага цар тахлын үед ажиллах төлөвлөгөө боловсруулж ажиллаж байна. Өнөөдрийн байдлаар 7 постод албан хаагч нар үүрэг гүйцэтгэж байна. Дөрөв нь байнгын постод, гурав нь түр хяналтын цэгт үүрэг гүйцэтгэж байгаа.

-Иргэд зөрчил гаргаж байна уу? 

-Нийт иргэддээ анхааруулахад хамгийн сайн хамгаалалт бол “Дэг журмыг сахих” гэж ДЭМБ-аас зөвлөж байгаа. Иймд ДЭМБ, ЭМЯ, та бүхний аюулгүй байдлын төлөө ажиллаж байгаа төрийн албан хаагч, тэр тусмаа ЭМБ-ын ажилтан, ОБГ, цагдаагийн хууль ёсны тавьсан шаардлагыг биелүүлж, өгч буй зөвлөмжийг дагаж мөрдөх хэрэгтэй байна. Ингэж чадвал бид бүхэн цар тахлын үеийн хүнд хэцүү нөхцөл байдлыг даван гарна.

Хоорондын зай барих, маскаа тогтмол зүүх, ариутгал, халдваргүйжүүлэлт, хамгааллын дэглэмийг ягштал баримтлах, журмын дагуу сэжигтэй бус нутгаас ирсэн тохиолдолд 14 хоногийн турш өөрийгөө гэртээ тусгаарлах шаардлагатай. Энэ тал дээр иргэдийн ухамсар дээшилсэн хэдий ч зарим нэг тохиолдолд ажиглалтын дэглэм зөрчиж, холбогдох хуулийн дагуу арга хэмжээ авахад хүргэж байна.

Хорио цээрийн дэглэмийн дагуу бүртгүүлж гарах ёстой байтал бүртгүүлэлгүй, нууцаар, хулгайгаар хүн тээвэрлэх зэргээр зөрчил гаргах тохиолдол бас гарч байгаа. Энэ тохиолдолд хууль, дүрмийн дагуу Зөрчлийн тухай хуулиар арга хэмжээ авч байна.