Хувиргасан амьд организмыг шинжлэх лабораторитой боллоо

2014-05-13 08:57:01

Үйлдвэр, хөдөө аж ахуйн яамны хөрөнгө оруулалтаар ШУТИС-ийн “Хүнс судлалын эрдэм шинжилгээний төв” үүдээ нээгээд удаагүй байна. Энэ төв нь үндэсний хэмжээнд хүнсний түүхий эд, бүтээгдэхүүний химийн найрлага, бүтэц, монгол орны ургамал амьтны гаралтай хүнсний түүхий эд, материалын биологийн төрөл зүйлийн судалгаа, нийгэмд чиглэсэн үндэсний хэмжээний зөвлөх үйлчилгээ үзүүлэх эрдэм шинжилгээний бүрэн хүч чадал бүхий лаборатори ажээ.

Энэхүү орчин үеийн, цоо шинэ лабораторийн үйл ажиллагаатай БОНХ-ийн Сайд С.Оюун, БОНХЯ-ны Хүрээлэн буй орчин, байгалийн нөөцийн газрын дарга Д.Энхбат, Гадаад хамтын ажиллагааны хэлтсийн дарга Д.Батболд, Био аюулгүй байдлын чадавхийг бэхжүүлэх төслийн үндэсний зохицуулагч О.Билгүүн, Био аюулгүй байдлыг хангах үндэсний хорооны нарийн бичгийн дарга С.Баярхүү болон тус хорооны ажилтан Ж.Сонормаа нар танилцлаа.

Тус “Хүнс судлалын төв” нь химийн бүрдлийн судалгааны лаборатори, молекул биологи, генетикийн лаборатори, дархлал, зохицуулах үйлчилгээний судалгааны лаборатори гэсэн чиглэлээр судалгаа, эрдэм шинжилгээний ажил хийх юм. Түүнчлэн хувиргасан амьд организм, түүнээс гаралтай түүхий эд, бүтээгдэхүүнийг илрүүлж, тодорхойлон шинжлэх аж. “Хувиргасан амьд организм” гэж орчин үеийн биотехнологийн аргаар гарган авсан удамшлын мэдээллийн шинэ хослол бүхий аливаа амьд организмыг хэлдэг байна.

“Хүнс судлалын төв”-ийн Молекул биологи, генетикийн лаборатори нь амьтны болон ургамлын гаралтай бүтээгдэхүүний удмын санг судлах, баталгаажуулах, хүнсээр дамжин эмгэг үүсгэгч бичил биетэнтэй тэмцэх, хянах талаар судалгаа хийх, шилжмэл гентэй хүнсний бүтээгдэхүүний найрлага, тэдгээрийн эзлэх хувийг өндөр нарийвчлалтай судлах ажээ. Тус төвд одоогоор дадлага туршлагатай 20 гаруй эрдэмтэн судлаач ажиллаж байна.

	Хувиргасан амьд организмыг шинжлэх лабораторитой боллоо
Үзсэн: 2748	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.