1973 онд Засгийн газрын шийдвэр гарч Монголын театрын музейг байгуулахаар болсон боловч зориулалтын барилга байгууламжийн байдлаас болон хойшлогдсоор 1991 оны 3 дугаар сарын 27-н буюу Олон улсын театрын өдрөөр нээгджээ. Тус музей нь Монгол Улсын шинэ үеийн театрын урлагийн үүсэл хөгжлийг харуулсан уран сайхны мэргэжлийн музей юм.

Улсын төв театраас эхлээд дуурь, балет, хүүхэлдэй, цирк, кино зэрэг тайз дэлгэцийн бүх төрлийн урлагийн түүхэн хөгжлийн талаар дэлгэн үзүүлж, судалж, цуглуулж сурталчилдаг.

Музейн А танхимд нэрт уран бүтээлчдийн хөрөг, дүрүүдийн уран зураг, барималтай танилцана. Үзвэрийн Б танхимд шинэ цагийн ардын театрын анхны үүсэл, жүжгийн бүлгэм, клуб, Ардын цэнгэлдэх хүрээлэн, 1931 оны анхны Төв театрын тухай гэрэл зураг, 1960-1970 оны үед Монгол Улсын театр хоёр хуваагдаж Д.Нацагдоржийн нэрэмжит Драмын эрдмийн театр, Дуурь бүжгийн эрдмийн театр болсон тухай түүхэн гэрэл зураг, баримт бичиг, ахмад уран бүтээлчдийн бүтээл туурвилыг харуулсан гэрэл зургууд, зарим биет зүйлс, тухайн үеийн жүжгийн тоглолт, шүүмж судлал, ном товхимол, хувцас, макет, эскиз, дэлхийн болон европын орнуудын сонгодог ба үндэсний дуурь, бүжиг, драмын жүжгийн тоглолт зэргийг хураангуйлан харуулсан үндсэн үзүүлэн, эх сурвалж материалуудыг дэлгэн үзүүлжээ. Үзвэрийн В танхимд Монголын театрын уламжлалын тухай буюу нүүдэлчин ахуйд зохицсон үлгэр туульс, найр наадам, бадарчингийн явган яриа, цамын ёслол, ший янгууны тухай үзүүлэнгүүд байдаг. Мөн XIX зууны нэрт соён гэгээрүүлэгч Догшин ноён хутагт Данзанравжаагийн “Намтар дуулах дацан” хэмээх сүм театртай холбогдох баримтыг энд дэлгэн үзүүлжээ. Үзвэрийн Г танхимд Монгол кино урлагийн түүхэн хөгжил, 1940-өөд оноос эхлэлтэй анхны баримтат болон уран сайхны киноны тухай, түүнд хэрэглэж байсан аппарат хэрэгсэл, хувцас, ардын уламжлалт хөгжмийн зэмсэг гэх мэт үзмэрүүдийг үзэж болно.

Ташрамд дуулгахад, Монголын театрын музейгээс гадна Чойжин ламын сүм музей, Богд хааны ордон музей, Монголын үндэсний музей амралтын өдрүүдэд ажиллаж байгаа бөгөөд 16 хүртэлх насны хүүхэд музейн үзүүллэгийн танхимаар үнэ төлбөргүй үйлчлүүлнэ.