Украин болон барууны орнуудын удирдагчид ОХУ Украины хилээс цэргээ татаж эхэлсэн тухай мэдэгдэлд болгоомжтой хандаж байна.

Украины Гадаад хэргийн сайд Дмитрий Кулеба “ОХУ байнга янз бүрийн мэдэгдэл хийдэг. Тиймээс ч украинчууд “Сонссондоо итгэхгүй, харсандаа л итгэнэ” гэсэн дүрэмтэй болсон гэж хэллээ. Украин болон түүний холбоотнууд дипломат арга замаар байдал хурцдахаас сэргийлж чадсан гэж тэрбээр нэмж хэллээ.

Мөн тус улсыг эвсэлд нэгдэх эсэхийг зөвхөн Украин болон НАТО-гийн гишүүн орнууд л шийднэ гэж мэдэгдсэн байна. НАТО-гийн Ерөнхий нарийн бичгийн дарга Йенс Столтенберг “Бодит байдал дээр хурцадмал байдлыг намжаах шинж тэмдэг одоогоор байхгүй байна. Цэргийн хүч, хүнд техник зэвсгээ цаашид үргэлжлүүлэн эргүүлэн татах нотлох баримтыг НАТО хүсч байна” гэж мэдэгджээ.

АНУ-ын Ерөнхийлөгч Жозеф Байден мөн цэргийн хүчээ цөөрүүлэх ямар ч нотлох баримт алга гэж үзэж байгаа бөгөөд халдлага хийх аюул бодит хэвээр байна гэж мэдэгдлээ. Гэсэн хэдий ч тэрбээр "хүч хэрэглэхээс сэргийлсэн" шийдвэр гарна гэдэгт найдаж байна гэжээ.

Франц, Их Британийн удирдагчид мөн ОХУ яриа хэлэлцээнд нээлттэй байгааг сайшаажээ. Гэхдээ халдлага үйлдвэл хатуу хориг арга хэмжээ авахад бэлэн гэдгээ мөн мэдэгдсэн байна.