ОХУ-ын Батлан хамгаалах яам Ерөнхийлөгч Владимир Путины удирдлага дор бямба гарагт пуужингийн сургуулилалт хийхээ мэдэгдлээ.

Энэ сургуулилалт нь стратегийн саатуулах хүчин, тэр дундаа цөмийн зэвсэгт хүчний бэлэн байдлыг шалгах зорилготой гэж тэрбээр мэдэгдлээ. Сургуулилалтад агаарын сансрын хүчин, стратегийн пуужингийн хүчин, Хар тэнгисийн флот, Умард флот оролцоно.

Энэ үеэр баллистик болон далавчит пуужин хөөргөх бөгөөд Ерөнхийлөгч Владимир Путин сургуулилалтад биечлэн хяналт тавина гэж мэдэгджээ.

Кремлийн хэвлэлийн төлөөлөгч Дмитрий Песков баасан гарагт сургуулилалт ил тод болох учир бусад улс орон санаа зовох асуудалгүй гэж мэдэгдсэн байна. Гэвч зарим ажиглагч энэ алхам нь Украины асуудлаар үргэлжилсэн хурцадмал байдлын үед цэргийн шахалт үзүүлэх зорилготой гэж үзэж байна.

Мөн ОХУ-ын Ерөнхийлөгч Владимир Путин Беларусийн Ерөнхийлөгч Александр Лукашенкогийн хамт бямба гарагт болох цэргийн арга хэмжээнд оролцоно гэж мэдэгдлээ. Баасан гарагт тэд Москвад уулзсаны дараа хамтарсан мэдэгдэл хийх үеэрээ ингэж мэдэгдсэн байна. Хоёр улс ням гараг хүртэл хамтарсан цэргийн сургуулилалт хийх юм.

ОХУ-ын Ерөнхийлөгч Владимир Путин "НАТО-гийн орнуудын цэргийн үйл ажиллагаа нэмэгдэж байгаатай холбогдуулан манай хоёр улсын аюулгүй байдлыг хангахад шаардлагатай хамтын арга хэмжээг үргэлжлүүлэн авахаар хоёр удирдагч тохиролцсон" гэж мэдэгджээ.

Харин Беларусийн Ерөнхийлөгч Александр Лукашенко барууны орнуудыг Украины асуудлаар хурцадмал байдлыг улам нэмэгдүүлж байна гэж буруутгажээ.