ОХУ-ын Ерөнхийлөгч Владимир Путины зарлигийн тухай олон улсын байгууллагууд, улс орнуудын тэргүүнүүд өөр өөрсдийн байр сууриа илэрхийлж байна. Зарим хэвлэл ОХУ аль хэдийнэ цэрэг оруулж эхэлсэн гэж мэдэгдэж байгаа ч одоогоор энэ тухай албан эх сурвалжийн мэдээ байхгүй байна.

Энэ шийдвэрийг олон улсын тэргүүнүүд буруушааж, удаа дараагийн мэдэгдлүүд хийж байна. Владимир Путины зарлиг нь АНУ-ын Ерөнхийлөгч Жозеф Байдентай дээд хэмжээний уулзалт хийх үед саад болж магадгүй гэж ажиглагчид харж байна. Учир нь хэдхэн цагийн өмнө Макрон, Путин, Байден нар уулзахаар “зарчмын хувьд” тохиролцсон байсан. Гэхдээ Цагаан ордон Жозеф Байден, Влдадимир Путин нарын уулзалтыг "зарчмын хувьд" хүлээн зөвшөөрсөн нь гэдэг нь зөвхөн "халдлага болоогүй тохиолдолд" гэж онцолж байсан юм.

Жозеф Байдены хувьд тусгаар тогтносон бүс нутгуудад АНУ-ын эдийн засгийн бүх үйл ажиллагааг зогсоож, эдгээр бүс нутгаас бүх бараа бүтээгдэхүүн импортлох, тэнд хөрөнгө оруулахыг хориглох тушаалд гарын үсэг зураад байгаа.

Цагаан ордны хэвлэлийн төлөөлөгч Жен Псаки "Путины зарлигийн хариуд авч байгаа арга хэмжээ нь Орос Украин руу довтолсон тохиолдолд АНУ болон түүний холбоотнууд бэлэн байгаа хориг арга хэмжээнүүдээс тусдаа юм" гэжээ. Харин АНУ-ын Төрийн нарийн бичгийн дарга Энтони Блинкен "Олон улсын хуулийг илт зөрчсөн энэ үйлдлээс Оросыг ашиг олохоос сэргийлэхийн тулд уг тушаалыг гаргасан" гэжээ.

Нидерландын Ерөнхий сайд Марк Рютте Европын холбооны орнууд босогчдын бүс нутгийг ОХУ хүлээн зөвшөөрсөн. Эдгээр үйлдэл оролцсон бүх хүнд хориг арга хэмжээ авахаар тохиролцсон гэжээ.

Их Британийн Гадаад хэргийн сайд Лиз Трасс Засгийн газар өнөөдөр ОХУ-ын эсрэг мягмар гарагт шинэ хориг арга хэмжээгээ зарлана гэж мэдэгдлээ. НАТО-гийн Ерөнхий нарийн бичгийн дарга Йенс Столтенберг "Орос улс 2014 онд Крымийг өөртөө нэгтгэсэн. Харин одоо дахин түрэмгийлэх шалтаг бэлдэх гэж байна" гэж буруутгалаа.