Өчигдөр болсон Украин, Оросын хэлэлцээ үр дүнд хүрсэнгүй. Хэлэлцээний дараа Украины Ерөнхийлөгч Владимир Зеленский байр сууриа илэрхийлэхдээ хүсч байсан үр дүндээ хүрсэнгүй гэж мэдэгдсэн юм.

Беларусийн талаас зохион байгуулсан эхний уулзалт ямар нэг үр дүнд хүрсэнгүй. Харин уулзалтын дараа Украины Ерөнхийлөгч Владимир Зеленский НАТО-д элсэх өргөдөлд гарын үсэг зурсан юм.

Украины Ерөнхийлөгч Владимир Зеленский "Хэлэлцээрийн явцад Оросын талаас пуужин харвасан нь бидэнд шахалт үзүүлэх оролдлого байсан байна гэж би үзэж байна. Бид бүхэн энэ тактикийг хүлээн зөвшөөрөхгүй байна. Өнөөдөр би Европын холбоонд элсэх өргөдөлд гарын үсэг зурлаа. Энэ өдрийг бид 30 жил хүлээлээ. Бид Европтой хамт байх эрхийн төлөө тэмцсэн. Хэлэлцээрийн явцад нэг тал нөгөө тал руугаа пуужингаар харваагүй цагт шударга яриа хэлэлцээ өрнөж болно" гэжээ.

Тэгвэл хэлэлцээрт ОХУ-ын талыг төлөөлсөн Төрийн думын олон улсын хорооны дарга "Орос, Украины яриа хэлэлцээний гол үр дүн бол талууд бие биеэ сонсож байгаа явдал юм. Одоо бид зөвлөлдөх хэрэгтэй байна. Талууд бие биеэ сонсох нь чухал. Энэ бол өнөөдрийн хэлэлцээний гол үр дүн юм" гэж сэтгүүлчдэд хандсан мэдэгдэлдээ онцолжээ.

Даваа гарагт уулзалтыг зохион байгуулсан Беларусийн Гадаад хэргийн сайд Владимир Макей хямралыг шийдвэрлэхэд өөрийн үүргээ биелүүлсэн гэж мэдэгдлээ. Тэрбээр "Зарим эх сурвалжийн мэдээлж байгаачлан Беларусийн тал ямар нэг хариуцлагаас зайлсхийхгүй. Бид хямралыг шийдвэрлэхэд өөрсдийн хувь нэмрээ оруулахад бэлэн байна. Ялангуяа  энэ уулзалтыг зохион байгуулах нь маш хэцүү байсан. Уулзалт зохион байгуулахад Ерөнхийлөгч Александр Лукашенко, Ерөнхийлөгч Владимир Зеленский хоёрын утсаар ярьсан явдал чухал үүрэг гүйцэтгэсэн гэж би бодож байна" гэсэн байна. 

Хэлэлцээрийн үр дүнгийн талаар уулзалтад оролцогч талууд хэвлэл мэдээллийнхэнд тодорхой тайлбар өгсөнгүй.