ОХУ-ын Ерөнхийлөгч Владимир Путин Өрнөдийн эсрэг хоригоо сэргээнэ гэдгээ өчигдөр Засгийн газрын цахим хуралдаанд оролцохдоо мэдэгджээ. Оросын Засгийн газар төрийн байгууллага, бизнес, хувь хүмүүст нь хориг тавьсан Өрнөдийн улс орнууд, байгууллагуудын эсрэг нэмэлт хориг тавьж, Орос улс илүү хүчтэй болно гэж Кремлийн тэргүүн мэдэгдсэн байна.

Владимир Путин “Оросын газрын тосны импортонд тавьсан Вашингтоны хориг АНУ-д үнийн хөөрөгдөл үүсгэж, инфляц өсгөж байна, Вашингтоны эрх баригчид өөрсдийнхөө алдаанд Москваг буруутгаж байна. Оросын хувьд эдийн засгийн богино хугацааны үр ашгийн төлөө бол буулт хийхгүй. Өрнөдийн хориг арга хэмжээ ард иргэдийн амьжиргаанд нөлөөлөх нь мэдээж, гэхдээ Оросын ард түмэн үүнийг даван гарах болно” гэж мэдэгдсэн байна. Үүний зэрэгцээ Оросын Сангийн сайд Антон Силуанов Өрнөдийг гэрээгээр хүлээсэн үүргээ биелүүлэхгүй байна гэж буруутгаж, Өрнөдийн орнууд Орос улсад өдөр тутмын хэрэглээний барааны хомсдол үүсгэхийг оролдож, гадны эзэмшилтэй, амжилттай яваа бизнесүүдийг шахан гаргахад хүргэж байна гэж мэдэгджээ. Дэлхийн хамгийн алдартай брендүүд Орос улсад өөрийн бүтээгдэхүүнээ сурталчлах гэж маш олон жилийг зарцуулжээ. Тэдний зарим нь Өрнөдөөс Орос улсад тавьсан хориг арга хэмжээний улмаас дэлгүүр сүлжээгээ хааж гарч байна. Харин Оросын эрх баригчид гадны компаниудын хөрөнгийг төрд авахаа мэдэгдээд байна. Энэ тухай Оросын Засгийн газрын тэргүүн өчигдрийн хуралдаанд мэдэгдэхдээ хэрвээ гадны хөрөнгө оруулагчид Орос дахь компаниудаа хаавал тэдэнд тусгайлан хэрэгжүүлэх хуулийн төсөл бэлдсэн гэдгээ мэдэгджээ. Өөрөөр хэлбэл шаардлагатай гэж үзвэл хааж байгаа компанид нь хөндлөнгийн менежмент нэвтрүүлж, ажиллах хүсэлтэй хүмүүст нь шилжүүлэх юм байна. Өрнөдийн орнуудаас Орос улсад тавьсан хориг арга хэмжээ Оросын эдийн засагт богино хугацаанд нөлөөлж байна.

Тухайлбал, Оросын мөнгөн тэмдэгт рублийн ханш огцом унаж, гадны бизнесүүд Оросоос олноороо гарч, өргөн хэрэглээний бараа бүтээгдэхүүний ханш огцом өсчээ.

ЗХУ задарснаас хойших 30 жилд Орос улсад орж ирсэн гадны хөрөнгө оруулалт, түүнийг дагаж бий болсон олон сая ажлын байр үгүй болох төлөвтэй байгааг эдийн засгийн шинжээчид онцолсоор байна. Тодруулбал, Волксваген, Икеа, Эппль зэрэг том брендүүд үйлдвэрүүдээ хааж, худалдаагаа зогсоосон бол Бритиш Петролиум, Экссон, Шелл зэрэг эрчим хүчний магнат Оросоос гадны тос, байгалийн хий худалдан авахаа зогсоож, цаашид түншлэхгүй гэдгээ мэдэгдээд байна.