АНУ-д байгалийн хий, хүнс, орон сууцны үнийн өсөлтөөс шалтгаалсан хэрэглээний инфляц өнгөрсөн онд 7,9 хувьд хүрчээ. Энэ нь сүүлийн 40-н жилийн хамгийн дээд үзүүлэлтэд тооцогдож байна. Энэ үзүүлэлтэд өнгөрсөн 2 дугаар сарыг хүртэлх нэг жилийн хугацааны инфляцын өсөлтийг хамруулан тооцсон  байна. Өөрөөр хэлбэл, Орос Украинд цэрэг дайны ажиллагаа эхлүүлснээс хойших газрын тос, байгалийн хийн үнийн өсөлт энэ үзүүлэлтэд багтаагүй аж.

АНУ-ын Хөдөлмөрийн яамнаас пүрэв гарагт зарласан инфляцын өсөлтийн тайланд өнгөрсөн 2 дугаар сар хүртэлх 1 жилийн хугацааны өсөлтийн судалгааг багтаажээ. Украинд цэрэг дайны ажиллагаа эхэлснээс хойш АНУ-ын хэмжээнд байгалийн хийн дундаж үнэ галлон тутамдаа 62 центээр нэмэгдэж, 4,32 ам.долларт хүрчээ. Сүүлийн 12 сарын хугацаанд хэрэглээний зардал тогтмол өсөж, орон сууцны үнэ огцом өссөн, нийлүүлэлтийн байнгын хомсдолтой байсан нь Америкт инфляцыг сүүлийн 40-н жилийн хугацаан дахь хамгийн дээд түвшинд хүргэжээ.

1, 2 дугаар сард гэхэд бараг бүх төрлийн бараа үйлчилгээний үнэ өсчээ. Тухайлбал, хүнсний бүтээгдэхүүний үнэ 1,4 хувиар өссөн нь 1990 оноос хойших хамгийн өндөр үзүүлэлтэд тооцогдож байна. Мөн жимсний үнэ 2,3 хувиар өсч, 2010 оноос хойших хамгийн өндөр өсөлтөд тэмдэглэгдлээ. Үүнээс гадна шатахууны үнэ 6,6 хувиар, бэлэн хувцасны үнэ 0,7 хувиар тус тус өсчээ. Инфляцын энэ өсөлт нь эргээд жирийн иргэдийн амьжиргаанд хүндээр тусч байна. Эдийн засгийн энэ таагүй нөлөө нь завсрын сонгууль ойртсон ийм үед Ерөнхийлөгч Байден болон Конгресс дахь Ардчилсан намынханд улс төрийн гол сорилт болж байна. Инфляцын өсөлтийг зогсоохын тулд Холбооны нөөцийн банк ирэх 7 хоногт бодлогын хүүгээ 0,25 хувиар өсгөж, энэ онд хэд хэдэн удаа бодлогын хүүгээ нэмэгдүүлэх төлөвтэй байна. Хэрвээ Холбооны нөөцийн банк энэ онд зээлийг хэт хумивал эдийн засгийн өсөлтийг бууруулж, улмаар уналт руу түлхэх эрсдэлтэй гэж болгоомжилж байна.