Хоёр жил гаруйн өмнө цар тахал эхэлснээс хойш БНХАУ хамгийн томд тооцогдох хөл хориог Шанхай хотод есөн өдрийн турш буюу хоёр үе шаттайгаар тогтоосон байна. Тус улсын эрх баригчид эдийн засгийн тогтвортой байдлыг дэмжих үүднээс 25 сая орчим хүн амтай Шанхай хотод хөл хорио тогтоох санааг өнөөг хүртэл сайшаахгүй байсан юм.

Гэвч өнгөрсөн бямба гарагт Шанхайд нэг өдөрт бүртгэгдсэн Ковид халдварын тохиолдлын тоо хамгийн өндөр түвшинд хүрсний улмаас эрх баригчид байр сууриа эргэж харахаас аргагүй болжээ.

Шанхай хотод тогтоосон хоёр үе шаттай хөл хорио тогтоох хүрээнд эхний ээлжид, хотын зүүн хэсэгт өнөөдрөөс 4 дүгээр сарын 1-нийг хүртэл, баруун хэсэгт 4 дүгээр сарын 1-нээс 5-ны хооронд хязгаарлалт тогтоох юм байна. Энэ хугацаанд тухайн бүсүүдэд нийтийн тээврийн хэрэгслийг зогсоох бөгөөд компани, үйлдвэр аж ахуйн газруудын үйл ажиллагааг бүрэн зогсоох эсвэл хүмүүсийг гэрээс нь ажиллуулах хэрэгтэй гэж эрх баригчид зөвлөж байгаа аж. Халдварт өвчнөөс урьдчилан сэргийлэх, түүнтэй тэмцэх ажлыг нь дэмжиж, ойлгон хамтарч ажиллахыг хотын захиргааны зүгээс оршин суугчдад уриалсан байна.

Мөн Хятадын зүүн эргийн гол том боомт хот, санхүүгийн төв болсон Шанхай хотод ийнхүү шаталсан хэлбэрийн хөл хорио нэвтрүүлж байгаа нь хотын тал хувьд нь хэвийн ажиллаж амьдрах боломж олгож байгаа хэрэг гэж эрх баригчид мэдэгдсэн байна.

Шанхайгаас бусад хотын тухайд, халдварын тохиолдол эндэхээс харьцангуй цөөнтэй байсан ч хатуу хөл хорионд өртөж байгаа юм.