"Найрсаг Улаанбаатар" аяны зун цагийн нээлтийн ажиллагаа алс холын АНУ-ын “Бостон балет” компанийн гоцлоочдын модерн бүжгийн тоглолтоор эхэлнэ. Тоглолтыг “Монголын балетын хөгжил сан” Нийслэлийн Засаг даргын Тамгын газартай хамтран зохион байгуулж байгаа бөгөөд сонгодог бүжгийн урсгал XXI зуунд олон улсад хэрхэн эрчимтэй хөгжиж байгааг үзэгчдэдээ хүргэх юм. 

Мөн оюун санаа, сэтгэхүйн ертөнцөө үйл хөдлөлөөрөө харуулах, биеийнхээ бүхий л эд, эсийг амилуулж чадах бүжигчид, тэднээс гарах асар их эрч хүч, оргилсон энерги, хүний дотор орших нигүүлсэнгүй сэтгэл, уучлалыг мэдрүүлэх энэхүү тоглолтод МУГЖ Д.Алтанхуяг, Бостон балет компанийн гоцлоочдын хамтаар оролцоно.

Уг тоглолт “Night of Мodern” нэртэйгээр маргааш ДБЭТ-ын тайзнаас үзэгчдэд хүрэх юм. АНУ-ын Ерөнхийлөгчийн Цагаан ордон, Лондон хотын Роял театр,  ОХУ-ын Болшой театр,  Италийн Ла Скала зэрэг дэлхийн сор театруудын тайзнаа хүндэтгэлтэйгээр уригдан бүжих балетын урлагийн шилдгүүдийн тоглолтыг ийнхүү монголчууд эх орондоо үзэх боломжтой боллоо.

Тоглолтын тасалбарыг Улсын дуурь бүжгийн эрдмийн театрийн кассаар худалдаалж байгаа юм байна.