Иргэн Д 2021 оны 7 дугаар сарын 20-ноос 21-нд шилжих шөнө Дорнод аймгийн Хэрлэн сумын 7 дугаар багийн нутаг дэвсгэрт иргэн С, Т, Ч нарыг тээврийн хэрэгслээр дайрч алахыг завдсан, эрүүл мэндэд нь хохирол учруулсан, мөн М, О, Э нарын нэр бүхий есөн иргэн бүлэглэн нийтийн хэв журмыг зөрчиж бусадтай зодолдон, олон нийтийн амгалан тайван байдлыг алдагдуулсан, бусдын эд хөрөнгийг гэмтээсэн гэх хэрэгт Эрүүгийн хуулийн 10.1 дүгээр зүйлийн 2.6 /Хүнийг алах/, 20.16 дугаар зүйлийн 1 /Олон нийтийн амгалан тайван байдлыг алдагдуулах/-т зааснаар яллах дүгнэлт үйлдэн, Дорнод аймаг дахь сум дундын Эрүүгийн хэргийн анхан шатны шүүхэд 2023 оны 1 дүгээр сарын 5-ны өдөр шилжүүлсэн байна.

Энэ хэргийг өмнө нь Дорнод аймгийн прокурорын газраас 2021 оны 11 дүгээр сард яллах дүгнэлт үйлдэн аймаг дахь сум дундын Эрүүгийн хэргийн анхан шатны шүүхэд шилжүүлж байсан бөгөөд шүүхээс хэргийг хянан хэлэлцээд, нэмэлт мөрдөн байцаалтын ажиллагаа явуулах шаардлагатай гэж үзэн буцааж байжээ.

Түүнчлэн дээрх хэрэгтэй холбоотойгоор иргэн Э.О-д холбогдох “Худал мэдээлэл тараасан”, Ч, Б, Г, Б нартай бүлэглэн “Хууль сахиулагчийг эсэргүүцсэн” гэмт хэргийг Баянгол дүүргийн Эрүүгийн хэргийн анхан шатны шүүхээс хянан хэлэлцээд гэм буруутайд тооцож, зорчих эрхийг хязгаарлах ял оногдуулж шийдвэрлэсэн билээ.