Монгол Улсын Хөдөлмөр, нийгмийн хамгааллын сайд, Батлан хамгаалахын сайд нарын хамтарсан 2020 оны А/70-А/58 дугаар тушаалаар батлагдсан “Цэргийн алба хаагчдад мэргэжил, ур чадвар эзэмшүүлэх сургалт зохион байгуулах журам”-ын хүрээнд Хөдөлмөр нийгмийн хамгааллын сургалт, үнэлгээ, судалгааны институтээс олгосон зөвшөөрлийн дагуу “Техник технологийн политехникийн коллеж”-ийн богино хугацааны сургалтын хөтөлбөрөөр хугацаат цэргийн алба хаагчдад барилгын өргөн мэргэжил олгох сургалтыг энэ сарын 16-ны өдрөөс зохион байгуулахаар шийдвэрлээд байна.

Энэ ажлын хүрээнд Хөдөлмөр, нийгмийн хамгааллын сургалт, үнэлгээ, судалгааны институтийн захирал Б.Батцэцэг, Техник, технологийн политехникийн коллежийн захирал Ц.Баярмаа болон албан тушаалтнууд, Зэвсэгт хүчний 017 дугаар ангийн удирдлага оролцсон гурван талт уулзалтыг зохион байгуулав.

Уулзалтын эхэнд хугацаат цэргийн алба хаагчдад барилгын өргөн мэргэжлийг олгох сургалтын ач холбогдол, үр дүн, гүйцэтгэсэн бүтээн байгуулалтын ажил болон өөрийн хүсэлтээр ахлагчийн албанд томилогдон барилгын мэргэжлийн ахлагчийн бүрэлдэхүүний нөхөн хангалтыг нэмэгдүүлж байгаа талаар товч танилцуулгыг тэргүүн ахлагч А.Цэрэнтогтох танилцуулав.

Дараа нь энэхүү сургалтын стандарт, хөтөлбөр, боломж, хамтын ажиллагааны талаар Техник, технологийн политехникийн коллежийн сургалтын менежер Н.Мягмардорж дэлгэрэнгүй танилцуулга хийсэн юм.

Мөн энэ үеэр Хөдөлмөр нийгмийн хамгааллын сургалт, үнэлгээ, судалгааны институтийн захирал Б.Батцэцэг Зэвсэгт хүчний 017 дугаар ангийн Мод үржүүлгийн газарт ажиллах байнгын бүрэлдэхүүн болон хугацаат цэргийн алба хаагчдад богино хугацааны Ойжуулагчийн сургалтыг зохион байгуулсан ба цаашид үнэмлэх олгох саналыг дэвшүүлсэн зэрэг өндөр ач холбогдолтой уулзалт боллоо гэж Зэвсэгт хүчний Жанжин штабаас мэдээллээ.