Засгийн газрын тохируулагч агентлаг-Гаалийн ерөнхий газар, түүний харьяа байгууллагын үйл ажиллагаа, хүний нөөцийн бүрдэл, бүрэлдэхүүн, алба хаагчдын нийгмийн асуудал, ажлын гүйцэтгэл, ёс зүйн чиглэлээр шалган зааварлах, зөвлөн туслах чиг үүрэг бүхий Төрийн албаны зөвлөлийн Ажлын хэсэг тус байгууллагад ажиллаж эхэллээ.

Ажлын хэсгийг Төрийн албаны зөвлөлийн гишүүн С.Цэдэндамба ахалж буй бөгөөд Төрийн албаны зөвлөлийн даргын тушаал, ажлын удирдамжийг өнөөдөр Гаалийн ерөнхий газар, түүний харьяа байгууллагын удирдах болон ахлах ажилтнуудад танилцуулав. Танилцуулгын дараа “Монгол төрийн албан хаагчийн эрхэмлэл: уламжлал ба өнөө үе” сэдвээр Төрийн албаны зөвлөлийн гишүүн мэдээлэл хийж, төрийн албан хаагчдын ёс зүй, манлайлал, эрхэмжийн талаар зөвлөмж, чиглэл өглөө.

Зөвлөн туслах энэ ажил нь ердийн, төлөвлөгөөт арга хэмжээ бөгөөд Төрийн албаны зөвлөлийн хуулиар хүлээсэн хүний нөөцийн аудит, хяналт шалгалт хийх үндсэн чиг үүргийн хүрээнд хуулийн хэрэгжилтийг хангуулах, эрсдэлийг үнэлэх, зөвлөн туслах, мэргэшил арга зүйн удирдлагаар хангах зорилготой урьдчилсан шатны үйл ажиллагаа болно.

Гаалийн албан хаагчдын санал хүсэлт болон гаалийн үйлчилгээний талаар иргэдийн саналыг Төрийн албаны зөвлөлийн purevdagva@csc.gov.mn цахим хаягаар болон бичгээр 2023 оны хоёрдугаар сарын 05-ныг дуустал хүлээн авах болно.

Эх сурвалж: Төрийн албаны зөвлөл