Сар шинийн баяр ойртож буйтай холбогдуулан цагдаагийн байгууллагаас томоохон зах, худалдаа үйлчилгээний болон хүн ихээр зорчдог газруудад хулгайлах гэмт хэргээс урьдчилан сэргийлэх, таслан зогсоох, илрүүлэх зорилгоор нэгдсэн эргүүл хяналт, шалгалт зохион байгуулж дараах хэргийг илрүүлэн мөрдөн шалгах ажиллагаа явуулж байна. Тодруулбал, Сүхбаатар дүүргийн 9 дүгээр хорооны нутаг дэвсгэрт байрлах Баянбүрдийн автобусны буудал орчимд С.А /эмэгтэй, 13 настай/-н халааснаас “Iphone” загварын гар утсыг тодорхой эрхэлсэн ажилгүй Л.З /эрэгтэй 33 настай/ хулгайлан авч явсан хэргийг;

Сүхбаатар дүүргийн 11 дүгээр хорооны нутаг дэвсгэрт иргэн Б.Б /эмэгтэй, 20 настай/ “Samsung galaxy” загварын гар утас, иргэн А.Б /эмэгтэй, 25 настай / “Iphone 12 про” загварын гар утас алдсан хэргийг эрхэлсэн тодорхой ажилгүй сэжигтэй этгээд С.Б /эрэгтэй, 51 настай/, У.Б / эрэгтэй, 37 настай/, Г.С /эрэгтэй, 42 настай/ нар бүлэглэн хулгайлсан хэргийг илрүүлж, сэжигтэй этгээдүүдийг баривчлан Нийслэлийн цагдаагийн удирдах газрын Мөрдөн шалгах газрын Халаасны хулгайн гэмт хэрэгтэй тэмцэх хэлтсээс материалжуулан шалгаж байна.

Иймд иргэдийг худалдааны төв, нийтийн тээврийн хэрэгслээр бэлэн мөнгөтэй явах, гар утсаа халаасалж явах үедээ сонор сэрэмжтэй байж энэ төрлийн гэмт хэргийн хохирогч болохоос урьдчилан сэргийлэхийг цагдаагийн байгууллагаас анхаарууллаа.