МҮОНТ-ийн сурвалжлах баг зүүн аймгуудад ажиллаж байна.

Өчигдрийн цасан шуурганд Хэнтий аймгийн Баянхутаг сумын зарим айл хоттой хонио тэр чигт нь цасанд даруулжээ. Нөхцөл байдал хүнд байна.

Сэтгүүлч Ч.Өлзийсайхантай холбогдож мэдээлэл авлаа. Тэрбээр "Манай сурвалжлах баг Хэнтий, Сүхбаатар аймагт ажиллаж байна. Сүхбаатар аймгийн Түвшинширээ сумын малчид Хэнтий аймгийн Баянхутаг суманд оторлож байхтай таарлаа. Бид отроор яваа гурван малчны хотоор орсон. Энд өчигдөр 10 цагийн үед шуурч эхэлсэн цасан шуурга бүтэн 24 цаг үргэлжилжээ. Малчид цаг агаарын нөхцөл байдлыг харгалзан үзэж, малаа бэлчээрлүүлээгүй хашсан байна. Цаг агаарын нөхцөл байдал тун хүнд байсан учир хашаатай мал руугаа ч очих боломжгүй байж. Тэр ч бүү хэл, хоёр айлын хүмүүс хоорондоо оосор татаж явж байсан тухай бидэнд ярьж байна. Хэнтий аймгийн Баянхутаг суманд нэг айл хамгийн олон буюу 200 гаруй малаа цасанд даруулсан бол зарим суманд 40 гаруй мал цасанд даруулсан гэх мэдээлэл байна" гэсэн юм. 

Одоогоор малчид цас ухаж, хорогдсон малын сэг зэмийг гаргаж байгаа бөгөөд үүссэн нөхцөл байдлыг аймаг, сумын онцгой байдлын байгууллагад мэдээлээд байгаа юм байна. 

Малчдад одоо хамгийн хэрэгтэй зүйл өвс, тэжээл байна. Нөөцөлсөн байсан өвс, тэжээл нь дууссан малчид боодол өвсийг 25-30 мянгаар худалдан авч байгаа ч түүгээр тав орчим мал л тэжээх боломжтой. Түүнчлэн өвс, тэжээлийн олдоц муу байна гэсэн юм.     

Дэлгэрэнгүй мэдээг өнөөдөр "Цагийн хүрд" мэдээллийн хөтөлбөрөөр хүргэнэ. "Эргэх дөрвөн цаг" нэвтрүүлгийг маргааш МҮОНТ-ээр хүлээн авч үзээрэй. 

МҮОНТ-ийн сэтгүүлч Ч.Өлзийсайханы илгээсэн зургаас хүргэж байна.