Их Британийн Ерөнхий сайд Риши Сунак одоогоос долоо хоногийн өмнө долоодугаар сарын 4-нд бүх нийтийн сонгууль явуулах тов зарласан.

Үүнтэй холбоотойгоор Төлөөлөгчдийн танхимын депутатууд өчигдөр бүрэн эрхээ хураалгаж парламент татан буугдсаныг парламентын албан хуудсанд мэдээлжээ.

Бүх нийтийн сонгууль болохоос ажлын 25 хоногийн өмнө парламентыг татан буулгахаар хуульчилсан байдаг журмыг гүйцэлдүүлж байгаа нь энэ юм байна.

Их Британийн парламентын тухай хуулиараа өмнөх бүх нийтийн сонгуулиар бүрэлдэж анхны хуралдаанаа хийснээсээ таван жилийн дараа парламент автоматаар татан буугддаг.

Эсвэл Ерөнхий сайдаас өргөн мэдүүлсэн товыг хаан ёсчлон баталснаар парламент татан буугдах үндэс болдог байна. Энэ хүрээнд Ерөнхий сайд Риши Сунак энэ сарын 22-нд шинэ сонгууль товлож, хааны соёрхлыг хүлээж авснаа зарлаж байсан юм.

Улмаар өчигдрөөс Британийн парламент Доод танхим буюу Төлөөлөгчдийн танхимын бүх 650 депутат сул иргэд болжээ.

Харин дээд танхим буюу Лордуудын танхимын гишүүд томилогдсон хугацааныхаа дагуу бүрэн эрхээ үргэлжлүүлэх юм байна. Британийн “Скай ньюз” телевизийн судалгаагаар, намар зарлах хүлээлттэй байсан парламентын сонгуулийг Ерөнхий сайд Риши Сунак наашлуулж товлосон нь өнгөрөгч 4 сард Их Британи дахь инфляцын үзүүлэлт сүүлийн 3 жилийн доод үзүүлэлт 2.3 хувь руу буурсан эдийн засгийн эерэг үзүүлэлтэд гол суурилжээ.

Энэ үзүүлэлтийг Риши Сунакийн Ерөнхий сайдын албыг хүлээж авахдаа өгч байсан эдийн засгийн үзүүлэлтүүдийг ахиулах гол амлалт ажил хэрэг болсны нотолгоо гэж мэдэгдсэн. Гэсэн хэдий ч "Югов" судалгааны байгууллагын сүүлийн асуулгаар гэхэд Риши Сунакийн эрх баригч Консерватив нам 47 хувийн дэмжлэгтэй яваа сөрөг хүчний Лейборист намаас бүхэл бүтэн 27 хувиар доогуур үзүүлэлттэй явааг тоймчид онцолж байна.

Сүүлийн өдрүүдэд Риши Сунак Хойд Ирланд болон Уэльст сонгуулийн кампанит аянаа өрнүүлж, энэ хүрээндээ 18 настнуудыг заавал цэргийн алба хаах шаардлагагүй болгож, нэг жилийн цэргийн хөтөлбөрт хамрагдах эсвэл нийгмийн сайн дурын ажилд оролцуулах төлөвлөгөө танилцуулж байна.

Мөн тэтгэврийнхний татварыг бууруулах амлалт өгч байна.

Тэгвэл сөрөг хүчний Хөдөлмөрийн намын удирдагч Кир Стармер Шотланд болон бусад газарт мөрийн хөтөлбөрөө танилцуулж, үндэсний эрүүл мэндийн үйлчилгээнд хамрагдаж эмчлүүлэхэд хүлээгддэг удаан хугацаа, бусад чирэгдлийг багасгах зэрэг амлалтууд өгч буй юм байна.

Хоёр намын удирдагчид ирэх зургаадугаар сарын 4-нд телевизээр халз мэтгэлцэх юм байна.