АНУ-ын нисэх онгоц үйлдвэрлэгч "Боинг" компани Олон улсын сансрын станц руу хоёр нисэгчтэй сансрын хөлөг хөөргөлөө.

"Старлайнер" нэртэй энэ сансрын хөлгийн хөөргөх хугацаа хэд хэдэн удаа хойшлогдсоны эцэст ийнхүү хөөрч байна. "Боинг" компани мөн анх удаа нисэгчтэй сансрын хөлөг хөөргөж байгаа нь энэ юм.

"Боинг"-ийн "Старлайнер" хөлөг өнөөдөр оройдоо Олон улсын сансрын станцад хүрнэ гэсэн мэдээлэл байна.

Хөлөгт байгаа нисэгчид болох Бутч Уилмор, Суни Уиллиамс нар долоо хоногийн хугацаанд Старлайнерийн хөлөгт ажиллагааг нь туршиж, аюулгүй байдлыг нь шалгах даалгавартай яваа юм.

"Боинг" компанийн нисэгчтэй сансрын даалгавар нь энэ компанийн хувьд маш чухал үйл явдал гэж тооцогдож байна. "Боинг" компанийн иргэний агаарын тээврийн онгоцууд аюулгүй байдлын техник технологи нь алдаатай байсан гэж өнгөрсөн хугацаанд хэд хэдэн удаа үзлэг шалгалтад орсон. Мөн сансрын хөлгүүд нь олон жилийн турш сансарт гарахад бэлэн биш, нисэгчтэй хөөргөхөд эрсдэлтэй гэж хойшлогдож байсны эцэст хөөргөж байгаа тул даалгавар амжилттай болбол "Боинг" компанид итгэх олон улсын итгэлийг нэмэгдүүлнэ гэж үзэж байна.

2019 онд нисэгчгүй хөөргөх үед программын доголдлын улмаас Олон улсын сансрын станцад хүрч чадаагүй байна.

2022 онд НАСА дахин "Боинг"-оос алдаагаа засаж хөлгөө хөөргөхийг хүсэж байжээ.

Саяхан хөөрөх хугацаа нь товлогдсоны дараа ч хөлгийн хөдөлгүүрийн систем гели алдагдаж байгааг тогтоож, хэсэг хугацаанд харзнахаар болсон.

НАСА-гийн зүгээс сансрын нисэгчдийг хувийн компанийн онгоцоор хөөргөх сонголтуудыг олон болгох үүднээс "Боинг" компаниас сансрын хөлөг бүтээхийг хүсэх болсон юм.

НАСА агентлаг 2011 онд хамгийн сүүлд өөрсдийн бүтээсэн "Шаттл" хөлгийн даалгавраа эцэслэснээс хойш хувийн компаниудтай хамтрах сонирхолтой болсон.

Илон Маскийн SpaceX компанитай гэрээ байгуулж "Dragon capsule" сансрын капсулаар 6 удаагийн даалгавар хамтарч гүйцэтгэхээр болсон.

Энэ зургаан даалгавар нь үндсэндээ энэ жил дууссан тул НАСА "Боинг" компанитай гэрээлсэн ёсоороо сансарт хөлөг хөөргөх даалгавраа эрчимжүүлж эхэлсэн гэж ойлгож болно.

"Боинг"-ийн "Старлайнер" капсул сансарт амжилттай даалгавраа биелүүлж чадвал ирэх жилүүдэд НАСА "Боинг"-той удаан хугацаагаар хамтарч ажиллаж боломжтой болно.