Хятадын дарга Ши Жиньпин энэ сарын 2-6-ны өдрүүдэд Казахстан, Тажикистан улсад төрийн айлчлал хийнэ.

Хятадын ГХЯ-ны албан ёсны төлөөлөгчийн мэдээлснээр, эдгээр айлчлалын явцад Хятадын удирдагч Төв Азийн энэ хоёр улстай эдийн засаг, худалдаа, хөрөнгө оруулалтын асуудлууд, “Бүс ба Зам” санаачилгын хүрээн дэх өндөр түвшний хамтын ажиллагааг хэлэлцэхээр төлөвлөсөн байна.

Энэ удаагийнх Ши Жиньпиний Казахстан улсад хийх тав дахь удаагийн төрийн айлчлал бол, Тажикистан улсад сүүлийн таван жилд хийж байгаа анхны айлчлал гэдгээрээ онцлог байна.

Хятадын дарга эхлээд Астанад өнөөдөр ажлаа эхлэх ШХАБ-ын 24 дэх удаагийн дээд хэмжээний уулзалтад оролцох ёстой байна.

Долоодугаар сарын 3, 4-нд болох ШХАБ-ын дээд уулзалтад оролцогчид эдийн засаг, эрчим хүчний асуудалд гол төвлөрөхийн зэрэгцээ Орос-Украины дайнтай холбоотой болон бүс нутаг, дэлхийн улстөрийн бусад сэдвийг авч хэлэлцэх мэдээлэлтэй байна.

Энэ уулзалтын дараа хэрэгжүүлэх төрийн айлчлалуудын явцад Ши Жиньпин Казахстаны Ерөнхийлөгч Касым-Жомарт Токаев, Тажикистаны Ерөнхийлөгч Эмомали Рахмон нартай хоёр талын харилцаа, хамтын ажиллагааны гол тэргүүлэх чиглэлүүд, бусад сэдвээр яриа хэлэлцээ өрнүүлэхээр төлөвлөжээ.

Бээжин, Астанагийн харилцааны тухайд Хятад улс Казахстаны худалдааны гол түнш хэвээр, хоёр улсын хоорондох бараа эргэлт өнгөрсөн онд 41 тэрбум ам.доллар болж, өмнөх оныхоос гуравны нэгээр нэмэгдэж, түүхэн дээд үзүүлэлтэд хүрснийг “Чайна дэйли”-д тэмдэглэсэн байна.

Хятад улс Төв Азийн бүс нутагт “Хятад-Киргизстан-Узбекистан”-ыг холбосон тээврийн сүлжээг хөгжүүлэх зэрэг хэд хэдэн томоохон хамтарсан төсөлд олон тэрбум ам.долларын хөрөнгө гаргахаа мэдэгдсэн.

Тажикистанд Афганистантай залгаа хилийнх нь ойролцоо Хятадын оролцоотой нарны цахилгаан станц барихаар төлөвлөжээ.