Нийслэл Улаанбаатар хотын 2040 он хүртэлх хөгжлийн ерөнхий төлөвлөгөөний төслийг боловсруулахад 30 гаруй мянган иргэн саналаа ирүүлсэн байна.

Засгийн газраас энэ оныг “Нийслэлийн дэд бүтцийн хөгжлийг дэмжих жил” болгон зарласан.

Энэ хүрээнд Улаанбаатар хотын 2040 он хүртэлх хөгжлийн ерөнхий төлөвлөгөөний төслийг боловсруулж УИХ-д өргөн барьсан юм. Хууль тогтоогчид намрын ээлжит чуулганаар тогтоолын төслийг дэмжиж, ирэх сард эхлэх хаврын ээлжит чуулганаар хэлэлцүүлгийг үргэлжлүүлэн эцэслэн батлахаар төлөвлөж байна.

Хөгжлийн ерөнхий төлөвлөгөөнд нийслэлийн хэмжээнд хотуудыг соёл, боловсрол, хөдөө аж ахуй, хүнс, хөнгөн үйлдвэрлэл, тээвэр ложистик, эдийн засгийн тусгай бүс, аялал жуулчлалын чиглэлээр хөгжүүлэхээр тусгаж, 190 гаруй мянган ажлын байрыг шинээр бий болно гэж тооцжээ.

Мөн амьдрахад таатай, байгаль орчинд ээлтэй, ухаалаг хотыг хөгжүүлэх үзэл баримтлалын хүрээнд тогтвортой, идэвхтэй, дасан зохицох, цогц хүртээмжтэй байхад чиглэсэн 31 зорилт 111 дэд зорилт бүхий арга хэмжээг хэрэгжүүлэхээр тусгаад байна. Их хотын 2040 оны хүртэлх хөгжлийн ерөнхий төлөвлөгөөнд нийслэлчүүдийн санал тусгалаа олсныг Улаанбаатар хотын ерөнхий архитехтор Ч.Төгсдэлгэр хэллээ.

Улаанбаатар хотын 2040 он хүртэлх хөгжлийн ерөнхий төлөвлөгөөг баталж, хэрэгжүүлснээр нийслэлийн иргэдийн 90 гаруй хувь нь орон сууцанд, 10 орчим хувь нь сайжруулсан амины сууцанд амьдрах боломж бүрдэнэ гэж тооцсон байна.

Түүнчлэн нэг хүнд ногдох ногоон байгууламж, нийтийн тээврийн хүртээмж, эрчим хүчний эх үүсвэр нэмэгдэж, иргэдийн амьдралын чанар дээшлэн, агаар орчны бохирдлыг бууруулах ач холбогдолтой гэж үзэж байгаа юм.