Улсын Их Хурлын даргын 95 дугаар захирамжаар байгуулагдсан Ашигт малтмалын тухай хуулийн шинэчилсэн найруулгын төсөл боловсруулах үүрэг бүхий ажлын хэсгийн хуралдаан өчигдөр боллоо.

Тус ажлын хэсгийг Улсын Их Хурлын гишүүн Н.Наранбаатар ахалж байна. Ажлын хэсгийн хуралдаанд Б.Мөнхсоёл, Ж.Золжаргал, Д.Батлут, П.Мөнхтулга, Л.Мөнхбаясгалан, Ц.Мөнхбат, Г.Дамдинням, Г.Ганбаатар, М.Бадамсүрэн, С.Замира, Ж.Баясгалан, Б.Уянга, С.Ганбаатар, Х.Жангабыл, Р.Батболд нар оролцож боловсруулж буй хуулийн хүрээнд санал солилцлоо.

Хуралдааны эхэнд ашигт малтмалын тухай хуулийн хэрэгжилтийн үр дагаврын үнэлгээ, судалгааны тайланг Хууль зүйн ухааны магистр, хуульч, өмгөөлөгч Р.Хатансайхан танилцуулав.

Тодруулбал, Ашигт малтмалын тухай хууль дахь хайгуулын болон ашиглалтын тусгай зөвшөөрөлтэй холбоотой зохицуулалт Үндсэн хуулийн зорилгод нийцсэн эсэх, ашигт малтмалын тухай хуулийн дагуу хэрэгжих хайгуулын болон ашиглалтын тусгай зөвшөөрөл олгох, асуудалд иргэн, хуулийн этгээдийн болон орон нутгийн оролцоог хангаж буй эсэх, ашигт малтмалын хууль болон бусад хамаарах хуулийн уялдаа холбоо, хууль зүйн системчлэл ямар байна вэ зэрэг асуудлын хүрээнд судалгаа хийжээ.

Судалгааны үр дүнд суурилж, ажлын хэсгийн гишүүд асуулт асууж, хариулт авлаа. Үүний дараа Аж үйлдвэр, эрдэс баялгын яамнаас Ашигт малтмалын тухай хуулийн шинэчилсэн найруулгын үзэл баримтлалын хүрээнд гишүүдэд мэдээлэл хүргэлээ гэж Улсын Их Хурлын Хэвлэл мэдээллийн газраас мэдээллээ.