Засгийн газрын хэрэгжүүлэгч агентлаг Боловсролын ерөнхий газар, Бүгд Найрамдах Солонгос Улсад төвтэй Дэлхийн K-POP-ыг дэмжих сангийн төлөөлөлтэйгөөр байгуулагдсан Бүгд Найрамдах Солонгос Улсын 2HM консорциумтай санамж бичиг байгууллаа.

Хиймэл оюун ухаан болон аж үйлдвэрийн 4 дэх хувьсгалын эрин үед манлайлан ажиллаж, түүнд бэлтгэх олон улсын боловсролын хамтын ажиллагааны хэрэгцээ шаардлага нэмэгдэж буйтай холбогдуулан, дэлхийн хэмжээний шилдэг боловсон хүчнийг бэлтгэх зорилгоор шинэлэг, уян хатан боловсролын систем, платформыг бий болгох, оюутнуудын бүх талын хөгжилд чиглэсэн бодлого боловсруулж, боловсролын тулгамдсан асуудлуудыг шийдвэрлэхэд чиглэсэн стратегийн хамтын ажиллагаа болон хамтарсан боловсролын төслүүдийг хэрэгжүүлэхэд уг санамж бичгийн зорилго оршино.

Санамж бичгийн хүрээнд дараах чиглэлд хамтран ажиллана. Үүнд:

-Хиймэл оюун ухааны эрин үеийг тэргүүлэх шинэлэг боловсролын систем, платформыг хөгжүүлэхэд харилцан хамтран ажиллах;

-Хувь хүнд тохирсон AI-д суурилсан сонирхол, мэргэжлийн чиг баримжаа, суралцах чадамжийг үнэлэх хэрэгслийг нэвтрүүлэх;

-Дижитал ялгааг арилгах болон суралцах үр нөлөөг нэмэгдүүлэхэд зориулсан дижитал мэдээллийн технологийн боловсролын платформ хөгжүүлэх;

-Шинэлэг хичээлийн тогтолцоо, боловсролын хөтөлбөр болон ноу-хау-гийн дэмжлэг үзүүлэх;

-Монгол Улсын Боловсролын тогтолцоонд нийцсэн сургалтын хөтөлбөр, өөрөө удирдан суралцах судалгаанд суурилсан сургалтын загварыг боловсруулан туршин хэрэгжүүлэх;

-Бүгд Найрамдах Солонгос Улсын их сургуулиудтай хамтран ажиллаж, их сургуулийн хичээлийг урьдчилан судлах, кредит тооцох тогтолцоо бий болгох;

-Бүгд Найрамдах Солонгос Улсын MyPol сургуулийн Монгол дахь салбар сургууль байгуулах;

-Монгол, Солонгосын сурагчдын хосолмол солилцооны хөтөлбөрөөр дамжуулан дэлхийн иргэнийг хамтран бэлтгэх;

-Соёлын нэгдмэл боловсролыг дэмжих төсөл хэрэгжүүлэх зэрэг багтана.