Олон улсын хөдөө аж ахуй, газар тариалан, ойн аж ахуйн салбарын “Агро экспо 2025” нэгдсэн үзэсгэлэн “Буянт ухаа” спорт ордонд болж байна. Тус үзэсгэлэнг “Экспо Монгол” ХХК зохион байгуулж, Хүнс, хөдөө аж ахуй, хөнгөн үйлдвэрийн яам дэмжин оролцож байгаа билээ. Хөдөө аж ахуйн, газар тариалан, ойн аж ахуйн салбарын хөгжлийг олон нийтэд таниулж, шинэ боломжуудыг эрэлхийлэх, салбар дундын хамтын ажиллагааг өргөжүүлэх, харилцаа холбоог сайжруулах зорилготой юм. “Агро экспо” үзэсгэлэнд хөдөө аж ахуй, газар тариалангийн дэвшилтэт техник тоног төхөөрөмжүүдийн зэрэгцээ малын тэжээл, бордоо, ойн аж ахуйн, цэцэрлэгжүүлэлтийн бизнес эрхэлдэг аж ахуйн нэгжүүд, суулгац, зүлэг, цэцгийн үр нийлүүлэгчид бүтээгдэхүүн үйлчилгээгээ танилцуулж байна.

Мөн салбарын судлаач, эрдэмтэн, профессор, шинжээч, хөдөө аж ахуйн мэргэжилтнүүд салбарт бий болж буй өсөлт дэвшил, хөгжлийн чиг хандлагын талаар мэдээ мэдээлэл өгч байгаа юм. 

Үзэсгэлэнгийн нээлтэд Хүнс, хөдөө аж ахуй, хөнгөн үйлдвэрийн яамны Төрийн нарийн бичгийн даргын үүргийг Түр орлон гүйцэтгэгч Ц.Болорчулуун оролцож нээлтийн үг хэллээ. Тэрбээр “Монгол Улсын Ерөнхийлөгчийн санаачилсан “Хүнсний хувьсгал”, Засгийн газраас авч хэрэгжүүлж буй “Атрын IV аян”-ыг хэрэгжүүлэхэд “Агро экспо”-д оролцож буй та бүхний оролцоо хамгаас чухал гэдгийг онцлон тэмдэглэе. Хөдөө аж ахуйн тоног төхөөрөмжийн шинэчлэл, шинэ инноваци зайлшгүй хийгдэж байх ёстой. Хүнс, хөдөө аж ахуй, хөнгөн үйлдэрийн яамны бодлогын баримт бичигт энэ бүхэн туссан байгаа. Манай орон хөдөө аж ахуйн тоног төхөөрөмж үйлдвэрлэдэггүй, импортлогч орон хэдий ч орчин үеийн техник тоног төхөөрөмжүүдээр шинэчлэл хийж, шинэ технологиудыг нэвтрүүлж байна. “Атрын IV аян”-ы хүрээнд дилер компаниудад хөнгөлөлттэй зээл олгох асуудлыг шийдэж өгсөн. Энэ хүрээнд салбарын техникийн шинэчлэл хийгдэнэ гэж үзэж байгаа” хэмээн нээлтийн үгэндээ онцоллоо.