Монголын Волейболын Холбоо (МВХ)-ноос ирээдүй болсон шинэ залуу тамирчдаа дэмжиж, урт хугацааны системтэй тэмцээн уралдааныг нэмэгдүүлэх, дотоодын тэмцээнүүдийг шат дараалал, хоорондын уялдаа холбоотой болгох зорилгоор түүхэндээ анх удаа “Хөгжлийн лиг”-ийн тэмцээнийг зохион байгуулж байна. Тус тэмцээний нээлтийн үйл ажиллагаа энэ сарын 29-ний өдөр болж, энэ үеэр МВХ-ны ерөнхийлөгч Н.Амарзаяа Зүүн Азийн аварга шалгаруулах эрэгтэйчүүдийн тэмцээнийг 2026 онд Монгол Улсын нийслэл Улаанбаатар хотод зохион байгуулах эрхийг албан ёсоор авсан гэсэн баяртай мэдээг олон нийтэд зарласан юм. 

МВХ-ноос өмнө нь 2000, 2008, 2015, 2017 онуудад Зүүн Азийн АШТ-ийг эх орондоо зохион байгуулж байсан. Ингэхдээ эмэгтэйчүүдийн тэмцээнд гавьяат дасгалжуулагч Д.Халзан дасгалжуулагчтай баг 2000 онд мөнгөн медаль, гавьяат дасгалжуулагч Д.Баасансүрэн дасгалжуулагчтай баг 2008 онд хүрэл медаль хүртэж байсан амжилттай. Харин эрэгтэйчүүдийн тэмцээн 2015, 2017 онд манай улсад болоход дараалан 4-р байр эзэлж байсан билээ.

Тэмцээний нээлтийн ажиллагаанд холбооны ерөнхийлөгч Н.Амарзаяа тэргүүтэй удирдлагууд болон шинээр томилогдсон удирдах зөвлөлийн гишүүд оролцлоо. Өнгөрсөн есдүгээр сард МВХ-ны ээлжит бус чуулган болж, шинэ удирдлагын багийг сонгоод байгаа билээ. Шинэ ерөнхийлөгч Н.Амарзаяагийн хувьд МВХ-ны 68 жилийн түүхэн дэх анхны эмэгтэй ерөнхийлөгч бөгөөд тус холбооны 11 дэх ерөнхийлөгчөөр сонгогдоод байгаа юм. Мөн волейболын спортын олон улсын хэмжээний мастер А.Очгэрэл тус холбооны 9 дэх ерөнхий нарийн бичгийн даргаар томилогдон ажиллаж байна. 

Түүнчлэн холбооны ерөнхийлөгч Н.Амарзаяа нээлтийн ажиллагаанд үг хэлэхдээ “Монголын волейболын холбоо өөрийн гэсэн ордонтой болох гэж байгаа төдийгүй бүтээн байгуулалтын үйл ажиллагааны гэрээ хэлэлцэл амжилттай хийгдсэн” гэдгийг онцлон танилцуулсан юм. Монгол улсад волейболын спорт үүсэж хөгжсөний 100 жил, МВХ үүсэн байгуулагдсаны 70 жилийн ой 2027 онд болох ч тус холбоо өнгөрсөн хугацаанд өөрийн гэсэн ордон, спорт танхимгүй байсаар ирсэн билээ.

Хэрвээ энэхүү гэрээ хэлцэл бодит бүтээн байгуулалт, ажил хэрэг болж чадвал наад зах нь ордны түрээс, дагалдах зардлуудыг хэмнэхээс эхлээд тэмцээн уралдаан болон сургалт, семинар, хурал, уулзалтуууд гээд холбооны бүхий л үйл ажиллагаанд олон талын ашиг тус, ахиц дэвшил гарах нь дамжиггүй. Нэмээд орчин нөхцөлийг дагаж баг тамирчдад ч илүү боломж олгохын зэрэгцээ дотоодын тэмцээн уралдааны тоог нас насны ангилалд нэмэгдүүлэх, хугацааг уртасгах гээд бүх талын хөгжил дэвшилд үлэмж их хувь нэмэр үзүүлэх юм. Энэхүү үйл ажиллагаа нь бодит биеллээ олж чадвал зөвхөн одоогийн гэлтгүй ирээдүй хойч үеийн волейболчдынхоо хүсэл мөрөөдөлд оруулж буй том хөрөнгө оруулалт болох учиртай.  

МВХ-ноос "Дээд лиг"-ийн тэмцээнийг зохион байгуулж эхэлсний 30 жилийн ойгоо энэ онд тэмдэглэж буй. Гэсэн ч өнгөрсөн хугацаанд сонирхогчдын ангилал болон "Дээд лиг"-ийн дараагийн ангилал, түвшний тэмцээн уралдаануудыг зохион байгуулалгүй орхигдуулсаар ирсэн. "Дээд лиг"-ийн тэмцээн ч 2011 оноос хойш 8 жил завсардсаны дараа 2019 оноос эргэн сэргээж, өнөөгийн төрхөө олоод байгаа юм. Ийнхүү "Дээд лиг" эргэн сэргэснээс 6 жилийн дараа хөгжлийн лигийн тэмцээнтэй боллоо. Ингэснээр "Дээд лиг"-ийн багуудын өрсөлдөөн илүү нэмэгдэж, аварга болох медаль хүртэх өрсөлдөөнөөс гадна доош унахгүйн төлөөх өрсөлдөөн нэмэгдэж байна. Энэ нь тэмцээний ач холбогдол, тоглолтуудын чанарыг нэмэгдүүлж, сүүлийн тойрог сүүлийн тоглолт хүртэл тэмцэх сонирхолтой нөхцөл байдлыг бий болгох болно.

Нарийн учиртаа холбооноос дотоодын ганцхан лиг зохион байгуулаад түүнийгээ "Дээд лиг" гэж нэрлээд явах нь утгагүй. Яагаад гэвэл доод түвшний лиг нь хаана байна вэ гэдэг асуулт гарж ирнэ. Дээд гэж байгаа бол түүний дараагийн түвшний учир холбогдолтой тэмцээн байх л шаардлагатай. Энэ зах зээл гэх үү, энэ түвшин ангилалд гэх үү тус тэмцээн ямар хэрэгтэй байсан нь урьдчилсан шатны сонгон шалгаруулалтад 23 баг өрсөлдсөнөөс харж болно. Анхны жил учраас энэ жилдээ оролцож амжаагүй, бэлтгэж амжаагүй багууд ч цөөнгүй үлдсэн болов уу. Улмаар тэмцээнд шалгарсан шилдэг 10 баг эрхээ аван оролцож, хоорондоо эн тэнцүүхэн өрсөлдөөнийг үзүүлж байна. 

“Хөгжлийн лиг”-ийн тэмцээн нь арван нэгдүгээр сарын 18-ны өдөр эхэлсэн бөгөөд эрэгтэйчүүдийн 10, эмэгтэйчүүдийн 9 багийн нийт 400 гаруй тамирчин өрсөлдөж байна. Багууд 2 тойргийн турш өрсөлдөж, эхний 4 байрт шалгарсан багууд цааш медалийн төлөө тоглох юм. Улмаар аваргын төлөө шалгарсан эхний 2 байрын баг “Дээд лиг”-ийн тэмцээний сүүлийн 2 байрт шалгарсан багуудтай “Дээд лиг”-т дэвшин оролцох эрхийн төлөө тоглох боломжтой болно гэдгээрээ онцлогтой.

Анхдугаар тэмцээн оролцож буй 19 багийн хооронд тойргийн шатанд нийт 162 тоглолт болох хуваарьтай байна. Мөн энэ тэмцээний хувьд аль болох олон тамирчинд боломж олгох үүднээс баг тус бүр 20 хүртэлх тоглогчтой байхыг зөвшөөрсөн гэдгээрээ бусад тэмцээнүүдээс давуу талтай. Мөн 2 хүртэлх тооны гадны тоглогчийг бүрэлдэхүүндээ оруулах боломжтой юм. Тэмцээний тойргийн шатны тоглолтууд “V-Court” ордонд болж байгаа бөгөөд медалийн төлөөх тоглолтууд “Степпе Арена”-д болно. Анхдугаар "Хөгжлийн лиг"-ийн тэмцээний аваргууд ирэх 2026 оны нэгдүгээр сарын 23-ны өдөр тодорно.