Израиль, Ираны хоорондын мөргөлдөөн шинэ шатанд шилжиж, эрчим хүчний стратегийн объектууд руу харилцан цохилт өгсөн талаар дэлхийн хэвлэлүүд мэдээлж байна. Өчигдрийн байдлаар Израиль Ираны хамгийн чухал хийн ордын нэг Өмнөд Парс болон газрын тосны орд руу агаараас цохилт өгсөн нь нөхцөл байдлыг улам хурцатгав.

Өмнөд Парс орд нь дэлхийн хамгийн том хийн ордод тооцогддог бөгөөд Ираны нийт хийн үйлдвэрлэлийн томоохон хувийг бүрдүүлдэг стратегийн чухал байгууламж юм. Цохилтын улмаас зарим боловсруулах үйлдвэрүүдийн үйл ажиллагаа түр зогсож, дэлхийн зах зээлд нефть, хийн үнэ огцом өсөхөд нөлөөлжээ.

Зарим эх сурвалжийн мэдээлснээр, АНУ Израилийн энэхүү ажиллагааны талаар урьдчилан мэдсэн боловч шууд оролцоогүй аж. Израиль мөн Ираны өндөр түвшний удирдлагуудыг чиглэсэн цохилтуудыг үргэлжлүүлж, сүүлийн өдрүүдэд Ираны аюулгүй байдал, тагнуулын салбарын хэд хэдэн томоохон албан тушаалтан амиа алдсан байна.

Иран Персийн булангийн бүс нутагт пуужингийн довтолгоо хийж, Катар болон Саудын Арабын чиглэлд цохилт өгсөн бөгөөд цаашид бүс нутгийн эрчим хүчний байгууламжуудыг чиглүүлэх боломжтой гэж анхааруулж, олон улсын эрчим хүчний аюулгүй байдалд ноцтой эрсдэл үүсгээд байна.

Мөргөлдөөн зөвхөн Израиль, Ираны хооронд хязгаарлагдаагүй бөгөөд Ливан, Ирак зэрэг улсууд ч татагдан орж, зарим бүс нутагт иргэд амь үрэгдэж, дэд бүтэц эвдэрсэн тухай мэдээлэл гарчээ.

Олон улсын хэмжээнд нөхцөл байдлыг зогсоох уриалга нэмэгдэж байгаа ба Ватиканы өндөр албан тушаалтан АНУ, Израильд хандан дайныг аль болох хурдан зогсоохыг уриалсан байна.

АНУ-ын Ерөнхийлөгч Дональд Трамп цэргийн ажиллагааг үр дүнтэй хэмээн үнэлж, Иранд учирсан хохирол урт хугацаанд сэргээгдэхгүй байж болзошгүй гэж мэдэгджээ.

Одоогоор мөргөлдөөн зогсох шинжгүй бөгөөд эрчим хүч, эдийн засаг, аюулгүй байдалд үзүүлэх нөлөө дэлхийн хэмжээнд нэмэгдэж байна. Тухайлбал, Хормузийн хоолойд нефть тээвэрлэлтийн саатал үүсч, олон улсын зах зээлд тодорхойгүй байдал үргэлжилсээр байгаа юм.