Ираны Исламын парламентын дарга Мохаммед Багер Калибаф дөрөвдүгээр сарын 9-ний орой бүс нутгийн нөхцөл байдлын талаар мэдэгдэл гаргаж, АНУ гал зогсоох хэлэлцээрийг зөрчихөө зогсоосон тохиолдолд л Иран хэлэлцээрийг авч үзнэ гэж мэдэгдлээ.

Тэрбээр, эс бөгөөс мөргөлдөөн дахин үүсэх боломжтой бөгөөд Ираны ард түмэн болон зэвсэгт хүчин ийм нөхцөл байдалд бэлэн байгаа гэж онцолжээ. Калибаф мэдэгдэлдээ Иран дайнд “маргаангүй ялалт” байгуулж, бүс нутаг болон дэлхийн дэг журам дахь байр сууриа бэхжүүлсэн гэж үзэж байгаагаа илэрхийлсэн байна. Гэсэн ч энэ нь зөвхөн эхний алхам бөгөөд цаашид цэргийн болон дипломат тэмцлийг хослуулан үргэлжлүүлэх болно гэжээ.

Түүний хэлснээр, Иран цэргийн болон дипломат арга хэрэгслийг салгаж ойлгох боломжгүй бөгөөд хоёр чиглэлийн зэрэгцээ ажиллагаагаар эцсийн зорилгод хүрнэ гэж үзэж байгаа аж.

Мөн Ираны тал АНУ-д бүрэн итгэхгүй байгаа бөгөөд Дональд Трампын ультиматумын дарамт дор хэлэлцээр хийхээс татгалзаж байсан гэдгийг дурдсан байна. Калибаф цааш нь, Трамп дотоодын санхүүгийн зах зээлийг тогтворжуулах зорилгоор Ирантай хэлэлцээр хийх талаар мэдэгдэл хийж, ультиматумын хугацааг гурван удаа сунгасан гэж мэдэгдсэн байна.

Ираны парламентын даргын энэхүү мэдэгдэл нь бүс нутгийн хурцадмал байдал бүрэн намжаагүй, нөхцөл байдал эмзэг хэвээр байгааг харуулж байна.