Монгол Улсын Ерөнхийлөгчийн ивээл дор "Цагаан алт" үндэсний хөдөлгөөний хүрээнд зохион байгуулагддаг "Алтан хайч-2026" хонь ноослогчдын улсын тэмцээнийг зохион байгуулах ажлын хэсэг хуралдлаа. 

Ажлын хэсгийг Монгол Улсын Ерөнхийлөгчийн Тамгын газрын дэд дарга Э.Золбоо ахалж буй бөгөөд хуралдаанд ЕТГ, ХХААХҮЯ, Төв аймгийн ЗДТГ, Жижиг дунд үйлдвэрийн газар, Монголын ноосон бүтээгдэхүүн үйлдвэрлэгчдийн холбоо ТББ болон "Монголчуудтай туршлага хуваалцая, үнэ цэнэ бүтээе" ТББ-ын төлөөлөл оролцож, 2026 оны тэмцээний бэлтгэл ажлын явц болон зохион байгуулалтыг хэлэлцлээ.

Малчдын ур ухаан, үндэсний уламжлал, ноосны үнэт чанарыг нийгэмд таниулах ач холбогдолтой тус "Алтан хайч-2025" тэмцээнийг өнгөрөгч онд анх удаа зохион байгуулсан бөгөөд гар хайч болон цахилгаан хайчаар ахлан суралцагч, мэргэжлийн гэсэн төрлөөр 21 аймгийн 100 гаруй тамирчид өрсөлдөж, малчдын хурд хүч, ур чадварыг тодруулсан юм.

Энэ онд тус тэмцээнийг илүү өргөн цар хүрээнд, өв соёлоо сурталчлах баяжуулсан хөтөлбөртэйгөөр зохион байгуулахаар төлөвлөж байна.