Эхний үеийн дунд хэсэгт Н.Анандын дамжуулалтаар Б.Өсөх-Ирээдүй тооны харьцааг нээсэн. Энэ нь түүний улирлын 14 дэх гоол нь байлаа. Ингэснээр Б.Өсөх-Ирээдүй нэг улиралд хамгийн олон оруулсан хувийн амжилтаа ахиулж байна. Тэрээр 2020/21 оны улирал 13 гоол оруулсан нь хувийн дээд үзүүлэлт нь байсан юм.

 

Тоглолтын 2-р үе эхлээд удалгүй М.Батхишигийн бэлдэж өгсөн дамжуулалтаар Ишикава Хиромаса багийнхаа тэргүүллийг бататгалаа. Үүний араас хаалгач Э.Ган-Эрдэнэ эсрэг багийнхаа торгуулийн цохилтыг хааснаар багийнхаа давууг бүрэн хадгалж үлдэж чадсан юм. Дэрэн баг ийнхүү 11 хожил 36 оноотой болсон бол “Централ Сталлионс” 39 оноотойгоор тэмцээнийг цааш үргэлжлүүлэхээр боллоо.

Эхний үед багууд 0:0 харьцаатай тэнцсэн бол 2-р үе эхлээд 7 минутын дараа Х.Цэнд-Аюушийн булангийн цохилтоос өгсөн дамжуулалтаар Д.Төрбат гоолын салхийг хагалсан. "Нийслэлчүүд" ийнхүү плэйоффын чухал шатны тоглолтууд эхлээд 2 тоглолт дараалан хөдөлгөөнгүй бөмбөгнөөс эхний гоолыг оруулж, бэлдсэн зүйл ихтэй байгаа гэдгээ дахин харууллаа. Үүнээс ердөө 1 минутын дараа “Улаанбаатар”-ын сөрөг довтолгоо амжилттай болж, А.Сүзүкигийн дамжуулалтаар Н.Сайнбуян багийнхаа 2 дахь гоолыг оруулсан юм.

 

Улмаар тоглолтын агуулга “Улаанбаатар” багийн талд бүрэн шилжиж, А.Сүзүки 3 дахь гоолыг оруулжээ. Тэрээр энэ улирлын өвлийн цонхоор багтаа нэгдэж, 10 тоглолтод 10 гоолд шууд оролцсон үзүүлэлттэй боллоо.

 

“Улаанбаатар” клуб ийнхүү ардаа бичигдэж байгаа багаасаа 8 оноо илүү болж, лигийн тэмцээнийг илүү итгэл төгс тэргүүлж эхэллээ.