Йемений Засгийн газрын Гадаад хэргийн сайд Афрах аз-Зуба Улаан тэнгисийн Баб-эль-Мандебийн хоолойд хутичууд Ираны Ормузын хоолойд хэрэгжүүлдэгтэй адил хяналт тогтоохыг зорьж байна гэж мэдэгдлээ.

Тэрбээр Саудын Арабын нийслэл Эр-Рияд хотод болсон хэвлэлийн бага хурлын үеэр хутичууд олон улсын далайн тээврийн урсгалд дарамт шахалт үзүүлэх замаар стратегийн чухал усан замыг хяналтдаа авахыг эрмэлзэж байгаа гэж мэдэгджээ. Мөн олон улсын хамтын нийгэмлэгийн хангалтгүй хариу арга хэмжээ нь тус бүлэглэлийн үйл ажиллагааг улам идэвхжүүлэхэд нөлөөлсөн гэж үзэж байгаагаа илэрхийлсэн байна.

Йемений Засгийн газар хутичуудын сүүлийн үеийн пуужин, нисгэгчгүй нисэх төхөөрөмжийн халдлага болон Улаан тэнгис дэх худалдааны усан онгоцуудад учруулж буй заналхийлэл нь бүс нутгийн тогтвортой байдалд ноцтой эрсдэл учруулж байгааг анхааруулжээ.

Хутичуудын хяналтад байдаг Баб-эль-Мандебийн хоолой нь Европ, Ази тивийг холбосон дэлхийн худалдааны хамгийн чухал далайн тээврийн замуудын нэг юм. Хэрэв энэ бүсэд мөргөлдөөн хурцадвал олон улсын худалдаа, эрчим хүчний нийлүүлэлтэд сөргөөр нөлөөлж болзошгүй гэж шинжээчид үзэж байна.