“Иргэн төвт төрийн үйлчилгээ”, “Хуулиа дээдэлж-Хариуцлагаа ухамсарлая” бүх нийтийн эрх зүйн боловсрол, өргөдөл, гомдлын шийдвэрлэлтийн нэгдсэн аяны хүрээнд Сүхбаатар дүүргийн Улсын бүртгэлийн хэлтсээс дүүргийнхээ хороодын зохион байгуулагч нарт зориулсан эрх зүйн сургалтыг өнөөдөр (2026.08.19) зохион байгууллаа.

Сургалтын зорилго нь хороодын зохион байгуулагч нарт улсын бүртгэлийн хууль тогтоомж, бүртгэлийн үйл ажиллагаа, төрийн үйлчилгээний талаар нэгдсэн ойлголт, мэдээлэл олгож, иргэдэд үнэн зөв зөвлөгөө, мэдээлэл хүргэхэд дэмжлэг үзүүлэхэд чиглэсэн бөгөөд уг сургалтаар дамжуулан оролцогчдын эрх зүйн мэдлэг, мэдээллийг нэмэгдүүлж, төрийн үйлчилгээг иргэдэд хүртээмжтэй, шуурхай хүргэхэд шаардлагатай мэдээллээр хангаж ажилласан байна. 

Сургалтад Сүхбаатар дүүргийн 20 хорооны зохион байгуулагч нар оролцож, Улсын бүртгэлийн хэлтсийн үйл ажиллагаатай танилцан, дараах чиглэлээр мэдээлэл, зөвлөгөө авлаа.

Үүнд:

- Улсын бүртгэлийн хэлтсийн үйл ажиллагааны танилцуулга

- Улсын бүртгэлийн багц хууль болон холбогдох бусад хууль  тогтоомжийн танилцуулга

- Улсын бүртгэлийн үйлчилгээ, үйлчилгээ авахад анхаарах асуудлын талаарх мэдээлэл

- Оролцогчдын асуултад хариулж, холбогдох чиглэлээр зөвлөгөө, мэдээлэл өгөв гэж Улсын бүртгэлийн ерөнхий газраас мэдээллээ.