Хэлэлцүүлгээр талууд ариун дагшин газар нутаг, малчдын эрх, уламжлалт мэдлэг, оролцоо, манлайлал,  газрын доройтол, цөлжилт, гангийн эсрэг асуудлыг авч үзэж, гарц шийдлийн талаар санал солилцов.

Хэлэлцсэн асуудлын хүрээнд бэлчээрийн нөхөн сэргээлт ба малчдын оролцоог хангуулах, хамтран ажиллах хүрээнд Сайд нарын хэлэлцүүлэг өрнөв. Энэ үеэр Хууль зүй, дотоод хэргийн сайд С.Амарсайхан “Монголчууд эртнээс байгальтайгаа зохицон амьдарч, ус, бэлчээр, ан амьтан, тахилгат уул усаа, хамгаалах авч ирсэн уламжлалтай ард түмэн.  Монголын уламжлалт улирлын нүүдэл, отор, бэлчээр сэлгэн ашиглах арга ухаан нь уур амьсгалын өөрчлөлтөд дасан зохицсон, тогтвортой менежментийн нэг юм. 

Өнөөдөр уур амьсгалын өөрчлөлт, ган, зуд, цөлжилт, бэлчээрийн доройтол, уул уурхай, хотжилт зэрэг нь манай орны экосистем, малчдын амьжиргаанд ноцтой нөлөөлөх болсон. Монголын нийт нутаг дэвсгэрийн 76.9 хувь тодорхой хэмжээгээр цөлжилт, газрын доройтолд өртсөн учир Монгол Улсын Засгийн газар энэ чиглэлд онцгой анхаарч ажиллаж байна.  Тодруулбал, Монгол Улсын Засгийн газар, Хууль зүй, дотоод хэргийн яам нь  Малчин өрхийн хамтын менежмент, бэлчээрийн зохистой ашиглалт, малчдын эрх, нийгмийн хамгааллыг дэмжих чиглэлээр эрх зүйн шинэчлэл хийж, хэдэн хэдэн хуулийн төслийг батлуулсан. 

Доройтсон газрыг нөхөн сэргээх нь зөвхөн байгаль хамгаалах асуудал бус ажлын байр, орлого, орон нутгийн хөгжил, залуучуудын нутагтаа үлдэх боломжийг бий болгох зэрэг онцгой ач холбогдолтой хөрөнгө оруулалт юм. Энэ чиглэлд Монгол Улс хөрөнгө оруулалтыг татахын тулд тогтвортой бодлоготой, тодорхой хууль эрх зүйтэй, ил тод, нээлттэй, иргэдийн оролцоо, шударга ёсыг эрхэмлэсэн байх учиртай юм” хэмээв. 

Цаашид тогтвортой газрын менежмент, биологийн олон янз байдлыг хамгаалах, гангийн тэсвэржилт болон UNCCD-ийн зорилтуудыг хэрэгжүүлэхийн тулд нутгийн уугуул иргэдтэй хамтран ажиллахаар талууд санал нэгдлээ.