Манай санхүүгийн зах зээлийн нийт активийн 90 хувийг арилжааны банк дангаараа эзэлдэг бол үлдсэн 10 хувийг хөрөнгийн зах зээл, даатгал, ББСБ, ХЗХ эзлэж байна. Арилжааны банк ийнхүү санхүүгийн зах зээлийн дийлэнх хувийг эзлэх нь эрсдэлтэй гэдгийг мэргэжилтнүүд хэлж байна. Тиймээс цаашид санхүүгийн зах зээлийг тэнцвэртэй хөгжүүлж банкнаас бусад салбарын өсөлтийг хангах шаардлагатай байгааг Санхүүгийн зохицуулах хорооны дарга Д.Баярсайхан хэлж байна. Энэ ч үүднээс санхүүгийн салбарын 2020 он хүртэл хөгжүүлэх нэгдсэн бодлого, стратегийг боловсруулж Засгийн газраар батлуулахаар ажиллаж байгааг тэрээр онцлолоо.

Өнөөдөр санхүүгийн салбарын нэгдсэн чуулга уулзалт болж байна. Энэ үеэр дээрх асуудлыг хэлэлцэж байгаа юм. Түүнчлэн энэ  чуулга уулзалтын үеэр иргэдийн санхүүгийн мэдлэг боловсролыг дээшлүүлэх талаар анхаарах хэрэгтэйг холбогдох хүмүүс онцлосон. Үүний тулд ЕБС-ийн хичээлийн программд санхүүгийн талын хичээл оруулж, олон сургалт явуулах нь зүйтэй гэж үзэж байсан юм. Бид өнөө орой "Тусгал" мэдээллийн хөтөлбөрөөр Санхүүгийн зах зээлийн өнөөгийн байдал, тулгамдаж буй асуудал, цаашдын чиг хандлагын талаар зочинтой дэлгэрэнгүй ярилцах болно.