Хуралдааны эхэнд Ерөнхий сайд Ч.Сайханбилэг Засгийн газрын бүтцийн талаар танилцуулсан юм. Үүнтэй холбогдуулан гишүүд асуулт асууж саналаа хэлсэн. Энэ үеэр Ерөнхий сайд Ч.Сайханбилэг улс орны өмнө тулгамдаж байгаа асуудлуудыг шийдэх үүднээс УИХ-д суудалтай намууд нэгдэж чадсан гэдгийг хэлсэн юм.

 

Мөн Ерөнхий сайд төрийн захиргааны тогтолцооны талаар танилцуулсан. Ингэхдээ Тахарын Ерөнхий газар зэрэг зарим газруудыг хасахаар болсон юм. Энэ талаар гишүүд Ерөнхий сайдаас эсрэг байр суурьтай буйгаа илэрхийлж М.Батчимэг болон Д.Эрдэнэбат нарын гишүүд Тахарын алба, Хилийн боомтын газрыг татан буулгах асуудлаа татаж авахыг Ерөнхий сайдаас хүсч буйгаа хэлсэн юм. Үүнээс гадна Үндсэн хуульд парламентын засаглалаа бэхжүүлэх өөрчлөлтийг хийх шаардлагатай байна гэдгийг зарим гишүүд дурдаж байлаа. Мөн Эдийн засгийн хүндрэлтэй байдлаас гарах асуудал нь намаас илүү улс эх орны нэн тэргүүний асуудал гэдгийг ч хэлж байсан юм.

 

Ингээд хуралдааны төгсгөлд гишүүдээс Засгийн газрын бүтэц, бүрэлдэхүүний тухай асуудлыг үргэлжлүүлэн чуулганы нэгдсэн хуралдаанаар хэлэлцэх эсэх асуудлаар санал хураахад гишүүдийн олонх нь дэмжсэн юм. Засгийн газрын асуудлыг үдээс хойш чуулганы нэгдсэн хуралдаанаар хэлэлцэнэ.