Нийслэлийн Иргэдийн Төлөөлөгчдийн Тэргүүлэгчдийн хурал өнөөдөр боллоо. Хурлаар “Улаанбаатар хотын гэр хорооллын цахилгаан хангамжийг 2020 он хүртэл хөгжүүлэх хөтөлбөр”-ийн тогтоолыг хэлэлцэж баталлаа. Уг хөтөлбөрийн хүрээнд иргэдийн хэрэгцээнд шинээр газар олгож байгаа 52 байршилд цахилгаан эрчим хүчний дэд бүтцийг шийдвэрлэх ажил багтсан байна. Тодруулбал, өнгөрсөн наймдугаар сард олгосон эхний таван байршилд цахилгааны шугам, дэд станц барихад 14.7 тэрбум төгрөг шаардлагатай гэсэн тооцоог нийслэлийн Захирагчийн ажлын албанаас гаргажээ. Хөрөнгийн эх үүсвэрийн 50 хувийг улсын төсвөөс, 30 хувийг нийслэлийн төсвөөс, 20 хувийг нь “Улаанбаатар цахилгаан түгээх сүлжээ” төрийн өмчит хувьцаат компаниас гаргуулахаар тогтоолын төсөлд тусгагджээ.