УИХ-д суудалтай гурван намын бүлгийн даргаар ахлуулсан Ажлын хэсэг Монгол Улсын урт хугацааны хөгжлийн бодлогыг боловсруулах, хөгжлийн стратеги боловсруулахаар ажиллаж байгаа юм. Мөн уг ажлын хүрээнд Монгол Улсын Ерөнхийлөгчийн Тамгын газрын дэргэдэх Үндэсний хөгжлийн хүрээлэнд дэд ажлын хэсэг байгуулагдаж, холбогдох бүх яамны Төрийн нарийн бичгийн дарга нар оролцсон Ажлын хэсэг жил гаруй хугацаанд ажиллаж байгаа ажээ.

 

Семинарын үеэр Мянганы интитутийн загварчлал болон шинжилгээ хариуцсан захирал доктор Вейшуан Чу “Макро эдийн засгийн Т21 загвар”-ыг танилцуулсан бөгөөд Монгол Улсад зориулан боловсруулсан загварыг танилцуулсан юм. “Макро эдийн засгийн Т21 загвар”-аар хөгжлийн бодлогоо дунд, урт хугацаагаар төлөвлөн ашиглаж буй 40 гаруй улс бий. Энэ загварыг Монгол Улсад нутагшуулахаар 2012 оноос эхлэн ажиллаж байгаа юм. Загвар нь нийт 60 дэд салбар, 2500 орчим хувьсагч, тэгшитгэлийн тусламжтайгаар систем динамикт суурилсан, эдийн засаг, нийгэм, байгаль орчны үзүүлэлтүүдийг цогц байдлаар шийдвэрлэн, салбар хоорондын уялдаа, нөлөөг харуулдаг аж. Эл загварыг 1994 онд НҮБ-ын Хөгжлийн хөтөлбөрийн техникийн дэмжлэгтэйгээр АНУ-ын Мянганы институтээс боловсруулж байжээ.