Азийн хоккейн холбооноос зохион байгуулж буй “Сhallenge Cup of Asia” тэмцээн Тайванийн Тайпэй хотноо үргэлжилж байна. Тэмцээнд оролцож буй манай шигшээ баг өчигдөр гурав дахь тоглолтоо хийж ялагдсанаар сүүлийн хоёр тоглолтдоо хожигдоод байгаа хэдий ч хүрэл медалийн төлөөх тоглолтод оролцоно.

Өчигдөр буюу гуравдугаар сарын 18-ны өдөр Монгол-Тайванийн багийн хооронд тоглолт болоход манайх 8:2 онооны харьцаагаар хожигдсон юм. Манай хоккейчид өмнөх тоглолтод АНЭУ-ын багт 1:6-аар хожигдсон. Энэ үеэр шүүгчийн буруу шүүлтээс үүдэн тоглолтын дундуур эмх замбараагүй байдал үүссэн юм.

Тус тэмцээнийг Тайвань, АНЭУ-ын багууд гурван хожилтой тэргүүлж байгаа бол Монгол, Тайландын багууд нэг хожилтой удаалж байна. Харин Макао улсын шигшээ баг дөрвөн хожигдол авч тэмцээнээ дуусгажээ.

Өнөөдөр Монгол-Тайландын багийн тоглолт болох бөгөөд хожсон баг тус тэмцээний хүрэл медалийг хүртэх юм. Энэхүү тоглолт Улаанбаатарын цагаар 15.30 цагт эхлэх бол АНЭУ-Тайванийн багууд аваргын төлөө өрсөлдөнө.

Сүүлийн хоёр дараалан тус тэмцээнээс хүрэл медаль хүртсэн манай хоккейчид ОХУ-ын Чита хотноо 14 хоногийн бэлтгэл хийж, Тайванийг зорьсон юм.