Монголын Оюун ухааны академийн ой тогтоолтын "Улсын аварга шалгаруулах оюуны спортын V дахь удаагийн тэмцээн"-ий урьдчилсан шатны шалгаруулалт  маргааш буюу гуравдугаар сарын 20-ны өдөр Монгол-Японы төв дээр болох гэж байна.

УАШТ-ий урьдчилсан шатны тэмцээнд нийт 120 тамирчин оролцохоор бүртгүүлжээ. Бага, дунд, насанд хүрэгчид гэсэн ангилалд ой тогтоолтын 10 төрлөөр өрсөлдөх бөгөөд эхний 50 тамирчин эцсийн шалгаруулалтад оролцох эрхийг авах юм. Харин ой тогтоолтын УАШТ-ий төгсгөлийн шат ирэх дөрөвдүгээр сарын 4-ний өдөр болж, 2015 оны аваргууд тодорно.

Тэмцээний 10 төрөлд нэр-царай, тооны марафон, хийсвэр зураг, дуут цифр, багц хөзөр, түүхэн үйл явдал, багананд өгөгдсөн үгс, хөзрийн дараалал зэрэг харааны болон сонсголын ой тогтоолтыг шалгах зэрэг дасгалууд багтжээ.

Ой тогтоолтын Улсын аварга шалгаруулах тэмцээний ерөнхий шүүгчээр ой тогтоолтын спортын олон улсын шүүгч Х.Хатанбаатар ажиллах ба тамирчдын гаргасан амжилт дэлхийн чансаанд бичигдэнэ.

Монголын Оюун Ухааны академи өнгөрсөн дөрвөн жилийн хугацаанд оюуны спортын 40 гаруй тэмцээн уралдаан дотооддоо зохион байгуулж 1500 гаруй тамирчинг хамруулжээ.

Мөн олон улсын чанартай 30 гаруй тэмцээнд оролцсоноос 349 медалийг авсны дотор дунд насны ангилалд дэлхийн 17 рекордын 14-ийг нь Монголын тамирчид эзэмшиж байна. 2014 оны 12 дугаар сард БНХАУ-ын Хайнань мужид зохиогдсон ДАШТ-ээс Монголын тамирчид 29 медаль хүртэж, багаараа II байрт шалгарсан амжилтыг үзүүлсэн юм.