Уран зохиолын шилдэг цомирлог “Улирал ба зохиолч” сэтгүүлийн 2015 оны зуны дугаар уншигч, захиалагчдынхаа гар дээр очлоо. “Хүмүүний ертөнцийг сэтгэлийн гэгээрэлд уримуй” уриаг тунхагаа болгосон тус  сэтгүүлийн хамт олон 6 дахь дугаараа өлгийдөн авч байна. 

Сэтгүүлийн энэ дугаарт доктор, профессор Ч.Жачингийн  бичсэн "Ашид мөнхийн алтан сургаал гэхийн учир"  судалгааны бүтээл, Ардын уран зохиолч, төрийн шагналт Б.Лхагвасүрэнгийн  "Боржигоны бор" тал шүлэг,  МЗЭ-ийн шагналт зохиолч Бя.Энхтуяагийн “Тал зоосны дууль" тууж, доктор профессор Цэндийн Эрдэнэбатын нэрт эрдэмтэн Чой.Лувсанжавт бичсэн захидал, Ардын уран зохиолч, төрийн шагналт зохиолч С.Дашдооровын 80  насны ойд зориулсан  “Айлын хүүхэн Алигэрмааг амилуулсан авьяастан” хөрөг, Японы сонгодог зохиолч  Накажима  Ацушигийн  өгүүллэг, “Шөнийн талд адуу янцгаана” зохиол төрсөн түүх, Хөдөлмөрийн баатар, АУЗ Д.Пүрэвдорж агсны “Чингис”  шүлгийн тухай “Хар домогт өртсөн нэгэн гайхамшигт шүлгийн тухай” өгүүлэл, Л. Нямаа, Ш.Цэрэнпил нарын хамтран бичсэн сонирхолтой өгүүлэл, 21-р зууны анхны роман “Хазаар хэлний толь бичиг” романыг зохиогч Сербийн  алдарт зохиолч Милорид Павичийн ярилцлага зэрэг онц сонирхолтой материалууд оржээ.

Тэрчлэн уламжлалт “Онол, судлал, шүүмж”, “Тэмдэглэлийн дэвтэр”,  “Эсээ” , “Яруу найраг”, “Үгүүллэг”, “Сүүтэй дөрөө” “Монгол туургатны яруу найраг”,  “Маамуу нааш ир”, “Наргиа” зэрэг  булангуудад ч  шинэ, сонирхолтой, онц содон бүтээлүүд тавигджээ.

Энэ дугаараас эхлэн  “Улирал ба Зохиолч” сэтгүүл Хил хамгаалах Ерөнхий газрын оюунлаг хамт олонтой хамтран ажиллаж  баатар хилчдийнхээ гавьяат үйлсийг  уншигч  түмэндээ  алдаршуулан танилцуулж  байгаа бөгөөд  эх орныхоо дархан хилийг хилчин дайчидтай  хамт маналцах  ариун үүрэг хүлээж байгаа аж. Өөрөөр хэлбэл “Улирал ба зохиолч”  сэтгүүл ХХЕГ-ын хилийн  анги, застав, отряд бүхэнд хүрч очиж байна.  Энэ удаагийн дугаарын онцлох зохиолчоор  Д.Нацагдоржийн болон МЗЭ-ийн шагналт яруу найрагч А.Эрдэнэ-Очир, онцлох номоор мөн Д. Нацагдоржийн болон МЗЭ-ийн шагналт яруу найрагч Авгаржин Жа.Баяржаргалын  18-р ном  “Дүрст чимгийн хас хүрдэн” ном тодорчээ.

Уран зохиолын шилдэг цомирлог "Улирал ба зохиолч" сэтгүүлийн зургаа дахь дугаараас уран зохиолын хорхойтон та бүхэн Монголын болон дэлхийн зохиолчдын шинэ, сонирхолтой шилдэг бүтээлүүдтэй танилцах болно.