АНУ болон Туркийн эрх баригчид Туркийн байлдааны нисэх онгоцуудыг хэт даврагч “Исламын улс” бүлгийн байлдагчдын байрлалд агаараас цохилт өгч байгаа эвслийн хүчний ажиллагаанд оролцуулах нөхцөлийг хэлэлцэж тохирлоо. Энэ талаар “Тун удахгүй Туркийн онгоцууд байлдааны даалгавар гүйцэтгэж эхэлнэ. Мөн хамтын ажиллагааг тэлэх боломжийг бас давхар хэлэлцэж байна” гэж Пентагоны төлөөлөгч Питер Кук мэдэгдлээ.

Түүний хэлснээр хоёр орны хооронд байгуулсан тохиролцоо бол хэт даврагч “Исламын улс” бүлгийн байлдагчдын эсрэг тэмцэлд чухал алхам болж байгаа гэнэ. Туркийн байлдааны нисэх хүчин өнгөрсөн долоодугаар сарын сүүлчээр Сирид хэт даврагчдын байрлалд анх удаа цохилт өгсөн. Гэхдээ тэд үүнийгээ энэ бол АНУ тэргүүтэй эвслийн бүрэлдэхүүнд бус бие даасан ажиллагаа гэж тухайн үед мэдэгдсэн юм. Өмнө нь Туркийн эрх баригчид хоёр удаагийн яриа хэлэлцээний эцэст Америкийн нисэх онгоцуудад нисэх хүчний баазаа ашиглах зөвшөөрөл өгсөн байна.