БНХАУ-ын нийслэл Бээжин хотноо агаарын бохирдол дээд цэгт хүрлээ. Үүнтэй холбогдуулан хотын эрх баригчид агаарын бохирдлын хоёрдугаар зэрэглэл буюу "улбар шар" өнгийн түвшний түгшүүр зарлажээ. Өчигдөр Бээжин хотын зарим цэгт агаарын бохирдлын хэмжээ Дэлхийн эрүүл мэндийн байгууллага аюулгүй гэж тогтоосон хэмжээнээс 17 дахин их түвшинд хүрсэн гэх мэдээ ирсэн байна.

Энэ нь нүүрсээр ажилладаг дулааны цахилгаан станцууд, тэднээс цахилгаанаа хангадаг аж үйлдвэрүүдийн үйл ажиллагаа болон барилгын талбайгаас ялгарсан тоосонцор зэргээс үүдэлтэй юм байна. Бээжин хотын чийглэг уур амьсгал, мөн сүүлийн үед тус хотод салхины эрч багассан зэрэг нь дээрх утаа нүүлгүй, тогтоход нөлөөлжээ.

Агаарын бохирдлын “улбар шар” түвшний түгшүүрийн хүрээнд аж үйлдвэрүүдийн үйл ажиллагааг хязгаарлах, түр зогсоох хүртэл арга хэмжээ авч хэрэгжүүлж байна. Түүнчлэн барилгын ажил эрхэлж байгаа талбайгаас хаягдал материал зөөвөрлөх, мөн хүнд даацын ачааны машинууд хотын замаар явахыг хориглож байгаа юм. Бээжинд үзэгдэх орчин хэдхэн зуун метрээр хязгаарлагдаж байгаа талаар зарим эх сурвалж мэдээлж байна. Лхагва гарагт агаарын хүйтэн урсгал Хятад руу нүүснээр салхины эрч нэмэгдэж, утаа багасна гэж мэргэжилтнүүд таамаглаж байна.