Пүрэв гарагт Германы автомашин үйлдвэрлэгч Фольксваген компани өөрийн төв байрандаа хэвлэлийн бага хурал зохион байгууллаа. Энэ бага хурлаар Фольксваген компани дизель хөдөлгүүртэй автомашинууддаа хорт хий ялгаруулалтыг хэмжих шалгалтад булхайцах зориулалттай программ хангамжийг 10 гаруй жилийн өмнөөс суурилуулж эхэлснийг тогтоосон гэдгийг тус компанийн удирдах зөвлөлийн дарга Ханс Дитер Пётч зарлажээ.

Мөн энэ хэрэг явдал тус компани дахь цөөн ажилтны гаргасан ёс зүйгүй санаа болон компанийн зүгээс ажилчиддаа тавих ёс зүйн хараа хяналт сул байснаас үүдсэн гэж Фольксвагений удирдлага дүгнэсэн байна. Ханс Дитер Пётчийн хэлж байгаагаар, Европын холбооныхоос өндөр жишиг бүхий АНУ-ын Байгаль орчны шалгалтыг Фольксвагений автомашинууд давах боломжгүй байсан учраас, тус компанийн ажилчид шалгалтад хууран мэхлэх программ ашиглах санаа сэдсэн байна.

Дизель хөдөлгүүртэй машинууддаа агаарт ялгарч байгаа хорт бодисын шалгалтын дүнг мэдэгдэхүйц бууруулж мэдээлдэг тусгай программ суулгасан гэдгээ “Фольксваген” өнгөрсесдүгээр сард хүлээн зөвшөөрч, улмаар энэ асуудлаар дотооддоо хяналт шалгалт явуулж эхэлсэн юм.