Спортын ертөнцийн хэвлэл мэдээллийн салбарын шилдэг уран бүтээлчдийг шалгаруулдаг "Sport Media Pearl Awards"-ын шагнал гардуулах ёслолын ажиллагаа  АНЭУ-ын Абу Даби хотноо болж өндөрлөлөө. Шагнал гардуулах ёслолын ажиллагаанд БНХАУ-ын тамирчин Америкийн үндэсний сагсан бөмбөгийн холбооны домог болсон Яо Минг /Yao Ming/ зэрэг алдартнууд оролцсон байна.

Шагнал гардуулах ёслолын ажиллагаанд тус улсын соёл урлагийн сайд Нахян Бин Мубарак тэргүүтэй төлөөлөгчид оролцож, шилдгүүдэд шагнал гардуулсан байна. Ёслолын ажиллагааг 2000 оны Сиднейн зуны олимпийн наадмын аварга, Их Британийн тамирчин Жонатан Эдвардс зохион байгуулжээ.

Нийт 700 гаруй сэтгүүлч, гэрэл зурагчид болон блогчид өөрийн бүтээлээ ирүүлсэн бөгөөд Олон улсын спортын хэвлэлийн холбоогоор ахлуулсан баг шүүлт хийж, эцсийн шатанд 85 бүтээлийг сонгон авч, 8 номинацид нэр дэвшүүлээд байсан юм. Хамгийн гол номинаци болох шилдэг сэтгүүлчийн шагналыг АНЭУ-ын үндэсний сонингийн спортын сэтгүүлч Паул Редли хүртсэн юм.

Тэрээр спортоор дамжуулан нийгэм дэх эмзэг бүлэгт байгаа иргэдийн амьдралыг сайжруулахад зориулж 'Sport for a Better World' цурвалыг гаргаж байсан. Энэхүү номинацийн ялагч нь 50.000 америк долларын шагнал хүртсэн ба шагналыг БНХАУ-ны тамирчин Яо Минг гардуулан өглөө.