Өнгөрсөн долоо хоногт АНУ-ын Би-52 бөмбөгдөгч онгоц Өмнөд Хятадын тэнгисийн маргаантай бүсийн дээгүүр нислэг үйлдэхдээ Хятадын байгуулсан хиймэл арлын усан хилд нэвтэрчээ. Энэ талаар Хятадын Засгийн газар Вашингтонд дипломат шугамаар гомдол хүргүүлсэн байна. Харин Америкийн тал бөмбөгдөгч онгоцоо Хятадын хиймэл арлын усан хилд санаатай оруулаагүй гэх тайлбар өгч байна. Пентагоны мэдэгдэж байгаагаар Би-52 бөмбөгдөгч онгоц эргүүл хийх даалгавартай явсан ч, цаг агаарын таагүй нөхцөлөөс шалтгаалан төлөвлөсөн замаасаа гажиж, улмаар арлын хилд нэвтэрчээ.

Өмнөд Хятадын тэнгис нь Зүүн Өмнөд Азийн хэд хэдэн орны хооронд газар нутгийн маргаантай байдаг бүс нутаг. Тус бүсэд Хятад хиймэл арал байгуулж, улмаар далайн хэмжээсээр 12 миль буюу 22 км газрыг өөрийн нутаг дэвсгэрт тооцож байгаа. Үүнийг АНУ эсэргүүцэж, өмнө нь сөнөөгч нисэх онгоц болон байлдааны хөлөг онгоцоо тус маргаантай бүс рүү илгээж байсан юм. Харин энэ удаагийн хэрэг явдал урьдаас төлөвлөөгүй гэдгээрээ тэднээс ялгаатай гэж Пентагон тайлбарлаж байна. Хятадын тал Америкийг бүс нутгийн газар нутгийн маргааны асуудалд хөндлөнгөөс оролцохгүй байхыг удаа дараа шаардсаар ирсэн. Гэвч АНУ олон улсын дэглэмтэй далай тэнгист эргүүл хийж, олон улсын хууль дүрмээр олгогдсон далайн навигацийн эрхээ хангаж ажиллана гэх байр суурьтай байгаа юм.